Munduko Txapelketa –Skyrunning Buff Mountain Festival- jokatzen dihardute asteburu honetan Vall de Boin (Lleida), hiru distantziatan. Kilometro bertikalen Munduko Txapelketa jokatu zuten atzo, barikua. Gaur, berriz, ultratrail distantziako (68 kilometro) munduko txapelketaren txanda izan da.
Emakumezkoetan Maite Maiora (Mendaro, 1980) izan da 68 kilometroko ibilbidea osatzen azkarrena, 9 ordu, 23 minutu eta 56 segundoko denborarekin. Lasterkerta hasieratik bukaerara nagusi izan da Espainiako selekzioarekin lehiatu den mendaroarra, eta ia 20 minutuko aldea atera dio helmugan bigarren egin duen Gemma Arenas (9:42:21) selekziokideari. Giuditta Turini italiarra sailkatu da hirugarren postuan (09:56:43) Gizonezkoetan Marc Casal gailendu da eta Manuel Anguitak egin du bigarren.
Aiguestortes eta Llac Sant Mauriciko Parke Nazionalean lehiatu dira antxitxikariak, ibilbide zirkular batean, harik eta 68 kilometroko eta ia 5.000 metroko goranzko desnibela zituen ibilbidea osatu arte.
21 herrialdetako 152 mendi korrikalari ari dira parte hartzen Nazioarteko Mendi Lasterketen Federazioak -ISF (International Skyrunning Federation)- antolatzen dituen munduko txapelketetan, hiru distantziatan: Kilometro Bertikala, Ultratraila (68 kilometroko) eta Mendi maratoia (42 kilometro). Azken hori, mendi maratoia, bihar jokatuko dute. Maiorak distantzia horretan lortu zuen, hain justu ere, 2016an irabazi zuen bere aurreneko Munduko Txapelketa, hura ere Lleidako Pirinioetan jokatu zuten.
∞Lotura duten albisteak:
- TransPeneda-Gêres 58 kilometroko mendi lasterketa irabazi du Maite Maiorak Portugalen (2021-06-09)
- Maite Maiorak bigarren egin du Espainiako Kopako bigarren proban, Miranda de Ebron (2021-05-18)
- Maite Maiora txapeldunorde Espainiako txapelketan, Kortazar irabazlearekin lehia estuan aritu eta gero (2021-05-03)
- Maite Maiorak hirugarren egin du Mont Blanceko Ultra Trailean, munduko mendi lasterketa luzeetan ospetsuenean (2019-08-31)
- Maite Maiora 2017ko munduko mendi lasterkari osoena (2017-10-15)
- Maite Maiora mendaroarrak, garaipena eta errekorra Zegama-Aizkorri mendi maratoian (2017-05-28)
- Maite Maiora mendi maratoiko Munduko txapeldun (2016-07-23)