Atzo, azaroak 1, jokatu zuten Euskal Herriko Aizkolari Txapelketa Nafarroako Arenan eta Vicentek jantzi zuen txapela. Atzokoa bigarren txapela du nafarrak maila gorenean [2019an jantzi zuen estreinakoa].
Lau kana-erdiko enbor, lau 60 ontzako eta lau oinbiko moztea zuten atzoko lana, eta Vicentek 41 minutu eta 11 segundoko denboran osatu zuen. Lau bat minutu gehiago behar izan zituen Hodei Ezpeletak berea egiteko (45:58), eta Oier Kañamares nafarra sailkatu zen hirugarren, 50:15 segundoko denborarekin. Atzetik gelditu ziren Julen Gabirondo, Josean Etxeberria eta azken orduan Jokin Urretabizkaiaren lekuan lehiatu zen Xuban Kañamares. Lesio bat tarteko ez ezin izan zen lehiatu atzo Urretabizkaia.
Txapelketa hasi aurretxoan, Mikel Mindegia aizkolari handia omendu zuten Nafarroa Arenara batutakoek. Hamar aldiz izan da Mindegia Euskal Herriko txapelduna eta bere ibilbidearen aitortza egin zion atzo Euskadiko Herri Kirol Federazioak. Dantzarien agurraren ondotik, Igor Duñabeitia Federazioko presidenteak txapela jantzi zion Mindegiari eta txaloka hartu zuten aizkolariek nahiz plazara batutakoek.
∞Lotura duten albisteak:
- Hodei Ezpeletak irabazi du Euskal Herriko aizkolari txapelketa, bigarren urtez jarraian (2022-11-27)