ELA sindikatuak jakinarazi duenez, “pasa den astelehenetik Hezkuntza Sailak ez du proposamen berririk egin, ezta mahai negoziatzailerik deitu ere. Grebalarien aldarrikapenei erantzunik eman gabe, grebak deskonbokatzea beste asmorik ez du agertu”.
Proposamen berririk ez
Ildo beretik egin du LAB sindikatuak, esanez, “nahiz eta ostiraleko prentsa-agerraldian astelehenean mahaira itzultzeko deialdia egin, Hezkuntza Sailak aurreko astean eta gaurko egunean negoziatzeko aukera eten” egin duela.
Eta gaineratu duenez, “hori gutxi balitz, akordio berri baterako proposamenik bidali gabe, grebak bertan behera uzteko eskaria luzatu die sindikatuei, gaur goizean bidalitako korreo baten bitartez”.
Steilas sindikatuak ere salatu du hori, esanez, zazpi greba egun daramatzatela “eta greba bezperetan Hezkuntza Sailak mugimenduak egin dituen arren, fede txarra eta jokabide traketsak” izan dituela.
"Xantaia eta fede txarra"
“Astelehen horretan xantaia izan genuen mahai gainean, hau da, haien jokoan sartu edo hurrengo egunetan negoziaziorik ez zela egongo esan zitzaigun. Eta horrela izan da, ez dugu “ez deirik, ez mezurik, ez ezer” jaso aste osoan zehar, eta Hezkuntza Sailak aukera izan du negoziazioarekin aurrera egiteko, baina ez du inongo borondaterik izan”; sindikatuak uste du hori “arduragabekeria itzela” dela.
Horrekin batera, gaineratu duenez “gaurko bilera tekniko bat aurreikusita zegoen, negoziazio prozesuarekin zerikusirik ez duena eta goizeko 6rak aldera bertan behera” utzi dute eta horrekin batera, “grebak bertan behera uzteko “gonbitea” egin” zai “hurrengo egunetan “azkar eta bizi prozesuari ekiteko”. Baina Steilasek uste du greba bertan behera uzten bada “langileok negoziatzeko indarra galtzen” dutela.
Horregatik guztiarengatik salatu nahi dute Hezkuntza Sailaren “fede txarra negoziazio prozesu honekiko, behar den astiarekin sindikatuekin neurriak adostu beharrean, azken momentuan, presekin eta xantaiak erabiliz jokatu nahi dutelako aurreko astean bezala”.
"Hitz egiten jarraitzeko borondatea"
Eusko Jaurlaritzari dagokionez, berriz, Begoña Pedrosa Hezkuntza Sailburuak berretsi egin zuen "Eusko Jaurlaritzak hitz egiten jarraitzeko borondatea duela, Euskadiko hezkuntza-sistemarako baliagarria izango den akordio bat lortzeko".
Esan zuenez, "ez gaude lan-gatazka baten aurrean", eta azpimarratu zuen, "benetan jokoan dagoena Euskadiko hezkuntza-sistemaren etorkizuna" dela.
Sailburuak defendatu zuen hezkuntza publikoa indartzeak "akordio arduratsuak eta erabilgarriak" eskatzen dituela, eta ziurtatu zuen Eusko Jaurlaritzak jarrera eraikitzailea eta propositiboa duela negoziazio mahaian. "Akordio on bat lortzetik gertu gaude, beste kolektibo eta mahai batzuetan eta 2022an egin dugun bezala".
Hitzaldia mezu argi batekin amaitu zen: "Aste hau galdu egin dugu. Aste honetan aurrera egiten jarraitu ahal genuen. Benetan lehentasunak partekatzen baditugu — sistema hobetzea, ikasleak zaintzea eta publikoa indartzea —, astelehenean greba bertan behera uzteko, mahaira itzultzeko eta hitz egiten jarraitzeko aukera izango dugu. Hori da bidea. Eta hor egongo gara ".