Gipuzkoako bertso-eskolen eguna ospatu zuten atzo Alegian, eta bertso-eskoletako 150 bat ikasle batu ziren guztira. Egun osoko jai-egitaraua antolatu zuten Bertsozale Elkarteak eta bertso-eskolek elkarlanean, eta egitarau horren barruan, goizean, Gelatik Plazara sariketan ere kantatu zuten 14 urtez azpiko bertsolariek. Finalak izan ziren Lehen Hezkuntzako ikasleentzat, eta kanporaketak DBHkoentzat. LHkoen bi finaletako batean, lau elgoibartarrek kantatu zuten: Oihane Meabebasterretxeak, Naia Eizagirrek, Sare Rubiok eta Nora Garatek. Etxean prestatutako agurraz gain, bat-bateko hainbat ariketa egin behar izan zituzten gaztetxoek, eta epaimahaiak Oiartzundik joandako hiru laguneko talde bat izendatu zuen txapeldun. Beste finalean, Oriokoek jantzi zuten txapela.
DBHkoen kanporaketetako batean, berriz, Elgoibarko eta Mendaroko talde banak parte hartu zuten, Errenteriako eta Hernaniko talde banarekin eta Oiartzungo hiru talderekin batera. Martin Serrano, June Langara, Unax Arzamendi eta Mikel Zubiaurrek osatzen dute berez Elgoibarko DBHkoen taldea, baina atzo hiru laguneko taldeak kantatu zuen, Zubiaurre falta zelako. Mendaroko taldea, berriz, Lizar Ezenarrok, Axular Larrañagak eta Luken Zulaikak osatu zuten, eta haiena izan zen finalerako sailkatu zen taldeetako bat (Errenteriako taldea izan zen kanporaketa horretan sailkatu zen beste taldea). Kanporaketa horrez gain, beste bi kanporaketa ere izan ziren atzo adin-tarte honetan Alegian bertan, eta haietatik beste bina talde apartatu zituzten epaileek finalerako. Barikurako antolatu dute finala, Azpeitian, Dinamoa espazioan, eta guztira, sei talde arituko dira kantuan: Orereta, Azpeitia, Azkoitia, Alegia, Zumaia eta Mendarokoak. Azaleko argazkian: Mendaroko hiru bertsolariak Irune Basagoiti irakaslearekin.
14 urtez azpiko bertso-eskoletako ikasleei bideratuta dagoen ekimena da Gelatik Plazara sariketa eta ikasleek bertsoarekin gozatzeko gune bat izatea eta jendaurrean trebatzeko aukera eskaintzea ditu helburu nagusi, bai eta Eskolarteko txapelketara iritsi aurretik zubi lana egitea ere.