Elgoibarko baserrietan ekoitzitako barazkiak, sagardoa eta sagarretik ateratako produktuak, eztia, baserriko ogia eta beste hainbat bertako produktu erosteko aukera izan da martxoko azokan. Horiez gain, bidezko merkataritzako produktuak ere saldu ditu Parrokiko Misio Taldeak, ohi duen moduan. Hil honetako azokan berrikuntza bat ere egon da, ArTalde taldeko zenbait kidek ere jarri baitute postua Kalebarren plazan.
Txosnan, berriz, Eusko Label Kalitatezko txahal sahiets eta txorixo pintxoak saldu dituzte Urazandiko jaiak berreskuratzeko sortu zuten Urajai taldekoek, aurtengo jaiak antolatu ahal izateko dirua batzeko kudeatu baitute txosna. Eta ez dute goiz txarra eduki, prest zuten genero guztia saldu dutela adierazi baitute.
Azkenik, gatzatoa egiten ikasteko aukera izan dute gaztetxoenek Atxutxiamaikak gidatu duen gatzato tailerrean. Gainera, mamia egiten ikasi eta egindakoa jan edo etxera eramateko aukera izan dute.
