Artzaintzari eskainiko diote hileko azken zapatuko feria

Barren.eus 2019ko mar. 27a, 20:35

Martxoko azken zapatuko feria berezia izango da, izan ere, artzaintzari eskainiko diote, eta ekintza guztiak artzaintzaren bueltakoak izango dira. Txosna, berriz, Atabal elkarteak kudeatuko du.

Martxoaren 30ean egingo den hileko azken zapatuko ferian artzaintza jarriko dute balorean. 12:00etan, gatzato tailerra egingo dute ume eta gaztetxoekin; 12:30ean Mausitxako Iñaki Ansolak gazta erakustaldia egingo du, eta Lizundia Txabolako ardiak nola jaizten diren ikusteko aukera ere egongo da.

•Arkume pintxoak

Trinitateetako danborrada antolatzen duen Atabal elkarteak jarriko du txosna, eta arkume pintxoak banatuko dituzte, 11:00etatik aurrera. Era desberdinetan sukaldatutako pintxoak izango dira: gisatuta, parrillan, saltsa desberdinekin… Armueta Harategia eta Belaustegi jatetxearen laguntza jasoko dute antolatzaileek. Aipatu behar da biharko feriako saltokietan erosketa egiten dutenek tiket bat jasoko dutela txosnako pintxoa doan dastatzeko.

Kale Kantariak 12:00etan irtengo dira, eta eguerditik aurrera ganadu erakusketa egingo dute Aita Agirre plazan. 

Lotura duten albisteak: