Elgoibarren 675. urteurrena ospatzeko urte guztirako egitasmoa prestatu dute

Elgoibarko Udalak, bere sail desberdinen bitartez eta herriko erakunde, kolektibo, talde eta boluntarioen laguntzarekin, ekintzaz beteriko egitaraua prestatu dute, besteak beste, erakusketa omenaldia, erakusketa filatelikoak, liburuen publikazioak, bisita gidatuak edo Udal Musika Bandaren kontzertua. Programa Elgoibar ofizialki sortu zen egunean bukatuko da, abenduaren 20an, alegia.

Ekitaldi horien inguruko xehetasunak azaldu dituzte gaur Ane Beitia, Elgoibarko alkateak; Andrea Arriola, Elgoibarko Udaleko Kultura Saileko zinegotziak; Blanca Salegi, Kultura Saileko teknikariak; Pello Arrieta eta Javier Elorza historialariek; Jokin Martínez, Ongarri argazki taldeko Koordinatzaileak eta Jesus Mari Sarasua, Ongarri taldeko kideak.
Elgoibarko Udalak 20.000 euro inguru inbertitu ditu 2021ean zehar gauzatuko den programan. Era askotariko ekintzok txiki zein nagusien aisialdia sustatzea dute helburu nagusi, eta anti-covid segurtasun neurri guztiak bermatuko direla zehaztu dute.

 • Logotiko lehiaketako irabazlea
Elgoibarko Udalak, Kultura Sailaren bitartez, lehiaketa bat jarri zuen martxan urteurren honekin identifikatuko den logotipoa aukeratzeko eta gaur eman dute irabazlearen berri. Alfonso Gimenezen (Castelló, Espainia) logotipoak irabazi du lehiaketa eta 300 euro jasoko ditu saritzat. Guztira hamahiru lan aurkeztu dira lehiaketara. Zentzu horretan, antolatzaileek gogorarazten dute saritu gabeko lanak eta pendriveak gaurtik aurrera jaso ahal izango direla HAZen, 30 eguneko epean (epe horren ondoren, jaso gabeko lanak ezabatu egingo dira).

∞Lotura duten albisteak:

• Elgoibarren 675. urteurrena ospatzeko logotipo lehiaketa abian da (2020-11-23)
• Elgoibar Erdi Aroan: Villamayor de Markina (2018-11-16)