Elgoibarko Kultur Etxean bilduko dira musikariekin eta herriko musika taldeekin, abenduaren 4an, 19:00etan. Usetxen eraiki dituzten entsegu lokalen kudeaketa eta funtzionamendua nolakoa izango den azalduko dute Udaleko arduradunek. Halaber, bileran areto horiek erabiltzeko arau batzuk ezartzeko aukera ere aztertuko dute.
Eraikinaren sotoan hutsik zegoen lokaletako batean eraiki dituzte bost entsegu gelak, bakoitza hogei metro koadrokoa eta intsonorizatua. 153.000 euroko kostua (B.E.Z. kanpo) izan dute lanek.
Elgoibarko alkate Ane Beitiaren esanetan, musika eskolatik kanpo hamabost talde inguru dituzte identifikatuta Elgoibarren. "Hainbestekoa da eskaera, non horietako talde askok entseguak egiteko lekurik ez dutela, eta hortaz, Elgoibartik kanpo joan behar dira bestelako aukeren bila. Esparru horretan dauden zailtasunen jakitun, Udalak, ahal duen neurrian, laguntza eskaini nahi die, entseguak egiteko toki bat eskainiz eta zergatik ez, gure herrian etorkizunean ospatuko diren kontzertuetan beren parte-hartzea sustatuz".