Euria zela-eta Ikastolako frontoian jokatu behar izan zituzten pala txapelketako finalak, barixaku arratsaldean. Emakumezkoen finala jokatu zuten lehenik. Jone Loiolak eta Amaia Loiolak Olatz Txurrukaren eta Inma Mugerzaren aurka jokatu zuten eta lehen biek ez zieten aukerarik eman bigarrengoei. Hasieratik hartu zuten aurrea markagailuan eta 22-5 gailendu ziren. Partida serioa jokatu zuten irabazleek, huts gutxi egin zituzten defentsan zein erasoan. Amaia nagusitu zen atzelarien arteko borrokan eta tanto ikusgarriak egiteko aukera eskaini zion domeinu horrek Joneri. Jarraian lortzen duten hirugarren garaipena da Jone eta Amaia lehengusinentzat.
Gizonezkoen finalean elgoibartarren eta debarren lehia ikusteko aukera izan zuten Ikastolako frontoiko harmailetan batutako ikusleek. Mikel Lopez Morcillo eta Sergio Saldago debarrek eta Asier Jauregi eta Unai Etxeberriak lehia estua izan zuten baina partida aurrera joan ahala tantoak debarren aldera joan ziren eta 22-15 irabazi zuten partida.
