Mintxeta Atletismo Taldeak jakinarazi duenez, 38 lan aurkeztu dira Mugertza krosari buruzko bigarren argazki lehiaketara eta Errenteriako Miguel Angel Ceberiok aurkeztutako “Campo a traves” izeneko argazkiak eskuratu du lehen saria. Antolatzaileen esanetan, lasterketa egunean izan zen egun argitsuari probetxua atera zioten argazkilari guztiek, baina epaimahaiak txuri-beltzean aurkeztutako argazkia saritzea erabaki du. Epaimahaiak era berean, Jokin Zubiaurre elgoibartarrak aurkeztu zuen “Bizipoza” izeneko argazkia saritu du bigarren sariarekin.
Herritarren saria, berriz, Haizea Sanchez elgoibartarraren “Ispilua” argazkiak eskuratu du. Lehiaketara aurkeztutako argazki guztiak Tantaka tabernan egon dira ikusgai azken hilabeteetan eta argazki gustukoenari botoa emateko aukera izan dute herritarrek. Haizea Sanchezek pista gaineko putzu batean islatuta ageri diren atletei ateratako argazkia izan da boto gehien eskuratu dituena.
Antolatzaileak pozik daude lasterketaren xarma eta kolorea islatzen duen lan mordoa jaso dituztela-eta. Hala ere, argazkiak ateratzen ibili ziren argazkilari guztiek ez dutela lanik aurkeztu diote. “Badakigu argazkilari asko izan zirela kreditatutakoak, baina guztiek ez dute lanik aurkeztu”. Hori dela-eta hurrengo urterako argazkiak aurkeztera animatu nahi dituzte horiek, “beti baita aberasgarria guztion lana ikustea”.
∞Lotura duten albisteak: