Nork bereak izango ditu, baina euskal dantza taldekoen jaialdia, esaterako, askoren ahotan ibili da. Ordubete inguruko saioa izan zen, eta bukaeran, modu batera edo bestera Mendaron dantza sustatzen jardun direnentzako esker-on hitzen ondotik -aipamen berezia egin zieten Amaia Ajuriagoikoa eta Imanol Arantzamendi dantza-irakasleei-, bi lagun omendu zituzten: Rogelia Horrillo, aurten dantzarako erabili dituzten arropetako asko josi zituen jostuna, eta Leonor Barreras, taldeko dantzari beteranoa.
Berezia izan zen, baita ere, Santa Ana eguneko aizkora txapelketa, besteak beste herriko bi gazte lehiatu zirelako, Uxue Ansorregi eta Hodei Ezpeleta, eta haietako batek, Ezpeletak, txapela jantzi zuelako Xuban Kañamaresekin bikotea osatuta.
Bere osoan izan da berezia aurten, baina, Santa Ana eguna, behar ez zuen arrazoiengatik: Gregorio Larrañaga Mañukorta, Mendaron hain estimatua zen bertsolaria, hil zela jakin zen bezperan, Santa Anan behar zuen jaia Garagartzan hasi zen, eta inprobisazioari inprobisazioa lotu zitzaion. Garagartzan hasi, eta plazan eman behar izan zioten errematea bertsolariek beren lanari, eta ez zuen jaiak besteetako molderik jarraitu.