Elgoibarren kasuan garbantzuak bildu behar ziren, eta arduradunek emandako datuen arabera, bi mila kilotik gora batu dira. Oso pozik agertu dira arduradunak emaitza honekin, eta eskerrak eman dizkiete elgoibartarrei.
Debabarrenean, orotara, 8.000 kilo elikagai bildu dituzte, eta lau pale bete dittuzte produktu higienikoekin. Horrez gain, 10.000 euro inguru lortu dituzte errifen salmentarekin, tupper solidarioarekin eta herritarrek zein enpresek egindako donazioekin. Zaporeak taldeko arduradunek esan dute aurreko edizioetako marka guztiak hautsi dituztela aurten, eta oso pozik agertu dira. Kanpainan babesle asko izan dituztela azaldu dute eta denei eman dizkiete eskerrak, baina bereziki, aipatu dituzte Cartonajes Eibar, Urkotronik, Bacalaos Alkorta, Frutas Do Santos eta Lumagorri.
Urkotronik enpresak lagatako biltegi pilatu dute bildutako dena, eta gaur Donostiara eramango dute Zaporeak elkarteak Martutenen duen egoitza nagusira. Gero, handik bidaliko dituzte Lesbosera, Zaporeak elkarteak ikusten duen beharraren eta momentuaren arabera, elkarte hori arduratuko baita banaketaz. Elikagaietako batzuk Zaporeak berak erabiliko ditu egunero egiten dituen jatorduak prestatzeko, eta beste batzuk hango familien artean banatuko dituzte eurek prestatzeko. Izan ere, Zaporeak Proiektuaren barruan, egunero 1.500 otordu prestatzen dituzte Lesboseko errefuxiatuentzat.
∞Lotura duten albisteak:
- Martxan da Lesbosen dauden errefuxiatuentzako janari bilketa (2021-04-12)
- Pedrosillano garbantzua batuko dute datorren astean, Lesboseko errefuxiatuentzat (2021-04-09)
