Debabarreneko Mankomunitateak hainbat neurri hartu ditu koronabirusa dela-eta, eta horietako bat da kaleak modu sakonagoan garbitzea. Mankomunitateko beharginek sodio hipokloritozko ura darabilte kaleak garbitzeko. Jende gehien batzen den guneak ari dira garbitzen bereziki, jende ilarak sortzen diren inguruak, denda eta supermerkatu inguruak, farmaziak dauden guneak, e.a. Elgoibarren joan den zapatuan hasi zituzten garbiketok, eta Mendaron gaur egin dute aurrenezkoz era honetako kale-garbiketa. Jon Salegi "Sarube" Mankomunitateko behargin mendaroarrak azaldu duenez, herritarrek eskerrak eman dizkiete egiten ari diren lanagatik. "Ez dago sinesterik. Normalean, kalea garbitzen dugunean jendeak ez digu eskertzen egiten dugun lana, alderantziz, badirudi traba bat garela batzuentzat. Kaleak sakonago garbitzen hasi garenetik, baina, asko eskertu digute herritarrek. Ikusgarria izan zen jendeak nola txalotzen gintuen. Emozionatzekoa", esan du. Bideoan ikus ditzakezue Salegiren adierazpenak.
