Mendaron Kilimon errekak ezin du ibairatu eta, beste behin ere, gainezka egin du Garagartza auzoan. SOS Deiak-ek jakinarazi duenez, 634 errepidea moztu egin behar izan dute Mendaro parean, 51. kilometroan, 21:00ak inguruan. 634 errepideko 62. kilometroan, berriz, Elgoibar parean, lur jausia eragin du gaur bota duen euri guztiak eta moztuta egon da errepidea.
Elgoibarren kalte gehiago ere sortu ditu urak. Kultur Etxeko sotoan estoldetatik egin du gainezka urak. Andikano eta Maltzaga arteko bidegorria ere azpian hartu du zenbait tartetan. Udaltzainak ere aritu dira garaje eta ibaitik gertu lokal eta komertzioak dituzten herritarrak ohartarazten, segurtasuin neurriak har ditzaten. Taberna batean ere beheko pisutik goikora pasa arazi dituzte bezeroak.
Euskalmeten webgunean ikus daitekeenez, Altzolako estazioan arrisku maila handiena gainditu du Deba ibaiaren ur emariak, 19:00ak inguruan, eta 21:00ak ingurura arte maila gorria gaindituta jarraitu du. Ordu horretatik aurrera emaria jaitsi eta hobetzera egin du egoerak, oraindik ere maila laranja gaindituta dagoern arren.
Duela urtebete ere maila gorria gainditu zuen Deba ibaiak Altzolako estazioan dagoen neurgailuan, 2015eko urtarrilaren 30ean, hain justu ere, eta urak kalteak eragin zituen Elgoibarren eta Mendaron.
