Joan den zapatuan, ekainaren 11n, hasi zen bainu denboraldia Mintxetako aire libreko igerilekuetan, eta Udal Kirol Patronatuak salatu du zabalik egon diren bost egun horietan "jarrera eta erabilera desegokia" erakutsi eta egin dutela haur eta gazteek, igerilekuetako aldageletan eta dutxetan. Azaldu dutenez, instalakuntzak zikindu eta kaltetzen dituzte paper-bustiz egindako pilotak jaurtiz (ikus bidali dituzten argazkietan)
Udal Kirol Patronatuko arduradunek gogora ekarri dute Covid-19aren pandemia baino lehen ere ematen zirela halakoak; eta, normaltasuna itzultzearekin batera, jarrera desegokiok ere bueltan direla. "Udal Kirol Patronatuak gertakizun hauek gaitzetsi ditu, denenak diren instalazioetan kalteak sortzen direlako eta ondorioak ekarri ditzaketelako. Horrelako jarrerek igerilekuetan jendearentzat oso eroso eta erabilgarriak diren aldagelen eta dutxen erabilera murriztea lortuko dute”, esan dute.
“Eskatzen dugu arduraz eta errespetuz jokatzea erabiltzaile guztiek eta zerbitzu publiko hauek guztion artean zaindu eta sustatzea”, berretsi dute Elgoibarko Udal Kirol Patronatutik.
∞Lotura duten albisteak:
- Mintxetako igerilekuan hiru gaztek eginiko "ekintza bandalikoak" gaitzetsi ditu Elgoibarko Udalak (2021-07-09)
