Dirudienez, jausitako etxean lanean ziharduten beharginak konturatu dira su txiki bat zegoela, 11:30ak inguruan. Teilatuan lanean ari ziren beharginak berehala jaitsi dira eta inguruko kaleetako jendea ere aldendu egin dute, kaleak itxiz. Eibarko suhiltzaile etxetik bi kamio ailegatu dira gero plazara. Egoera aztertu ostean, Kalegoen plazako ur iturrira konektatu dituzte mangerak eta itzali dute sua.
Ikusmin handia sortu du suhiltzaileen etorrerak eta jende asko egon da ikusmiran, zer gertatzen zen galdezka. Gas ihes bat egon zitekeenaren zurrumurrua zabaldu da, baina Elgoibarko Udaletik jakinarazi dutenez, ez da halakorik izan. Sua nola eta zergatik piztu den ere ez dakite, eta harrituta daude, inguruko argindar sarea moztu baitzuten barixakuan bertan, etxearen zatia jausi eta berehala.