Azken urteetan urriaren hasieran antolatu izan du Sanlok, baina azaroaren 6tik 9ra bitartean egingo dute garagardo festaren 11. ekitaldia izango dena. Eguenetik domekara bitartean zuzeneko musika emanaldiek, bingoak edo dantzaldiek girotuko dute azoka.
Mus txapelketa izango da aurtengo berrikuntzetako bat. Azaroaren 8an egingo dute, 16:00etatik aurrera Maalan; eta, parte hartu nahi dutenek azaroaren 4rako eman beharko dute izena 688 735 446 telefono zenbakiko watsappera mezua idatzita. Bikote bakoitzak 20 euro ordaindu beharko ditu parte hartzeko. Irabazleek txapela, afari bat Txarriduna jatetxean eta 200 euro jasoko dituzte saritzat. Txapeldunordeek Txarridunan afaria eta 100 euroko saria jasoko dute; eta, King-Kong tabernan afaria izango da hirugarren geratzen direnentzako saria.
Kontzertuak
Zuzeneko musika emanaldiei dagokionez, Diablues Ta Bluifer Band eta Los Gavilanes Mariachi Jubenil taldeek girotuko dute Sanlobeer festa. Lehenek azaroaren 7an emango dute kontzertua eta azaroaren 8an bigarrengoek. Hainbat garagardo mota egongo dira aukeran eta jatekoari dagokionez, egunero salduko dituzte ukondoa, saltxitxak, patata purea, oilaskoa eta patata frijituak. Azken egunean, domekan, paella erraldoi bat prestatuko dute, eta txartelak aurretik hartzea gomendatu dute.
Eguenean, azaroaren 6an egingo dute garagardo azokaren irekiera ekitaldia 19:00etan, eta 19:30ean zabalduko dute jendearentzat.
