Olaso industrialdean, Andikano baserriaren pare horretan, isuri bat izan zela salatu zuten astelehenean bi herritarrek eta zehaztu zuten ez zela estreinako aldia. Uztailean bi bider ikusi dute ura zikin inguru horretan, eta iaz sasoi honetan ere gertatu zela diote.
URA Agentziarekin harremanetan jarri gara gertatutakoaren berri izateko, eta erantzun digute bidali zutela ikuskaria isuria gertatu zen lekura inguruko enpresetakoekin hitz egitera eta laginak hartzera, ondoren laborategira bidaltzeko. Orain, laborategiko emaitzek ematen dutena jakin zain daude eta ez dute zehaztu isuriaren jatorria.