Elgoibarko Udaletik jakinarazi dutenez, gaur eta bihar gauean egingo dituzte zorua berritzeko lanak. Egurrezko xaflak egoera txarrean daudela-eta, kendu eta berriak jarriko dituzte. Egurrezkoak beharrean, plastiko birziklatuzkoak jarriko dituzte, aurrez Sigman edota Pilarreko zubian egin zuten moduan. Material seguruagoa izateaz gainera, iraupen handiagoa duela azaldu dute, eta "jasangarritasun-irizpideekin bat dator".
Berritze lanok trenaren katenariaren gainetik egingo direnez, gauez bakarrik egin daitezke, tentsioa eten beharra dagoelako. Obrak 23:00etan hasiko dira eta goizaldeko 5:30ak arte luzatuko dira.