Aurten, orain arte ez bezala, udaberrian izango da Euskaraldia ariketa sozialaren 4. edizioa, maiatzaren 15etik 25era bitartean, hain zuzen ere, “Elkar mugituz egingo dugu!” lelopean. Euskaraldiak euskara ulertzen dutenen hizkuntza ohiturak aldatzea du xede, eta Euskal Herri osoan eragiteko sortu dute, herritarren hizkuntza praktikak aktibatu eta euskararen erabilera areagotzeko, hau da, euskaraz gehiago, gehiagorekin eta gehiagotan egiteko, 11 egun iraungo duen praktika sozial masibo eta bateratu baten bitartez.
Hizkuntza ohiturak aldatzea ez da lan erraza, ordea. Hala ere, entitateek zeregin garrantzitsua dute Euskaraldian. "Horren jakitun izanik, Elgoibarko Udalak eta bere ardurapeko entitateek bat egin dute aurtengo deialdiarekin, eta modu aktiboan parte hartuko dute Euskaraldian", azaldu dute.
Udalak herritar guztiak animatu ditu ariketa sozial honetan parte hartzera, ondorengo loturan izena emanda (eman izena), "elkarrekin mugitzeko, euskararen erabileran urratsak emanez eta hizkuntza portaerak aldatuz, euskara gehiago erabiltzeko".
