Jarduerak 7.953.936 euroko oinarrizko aurrekontua izango du (BEZarekin) eta 25 hileko exekuzio-epea, obra esleitzen denetik zenbatzen hasita. Aldundiko bozeramaile eta Gobernantzako diputatu Irune Berasaluzek azaldu duenez, proiektuaren helburua da "pisu handiko trafikorako eta distantzia luzeko joan-etorrientzako funtsezkoa den azpiegitura hau berritzea eta indartzea, segurtasuna eta iraunkortasuna hobetuta".
Egitura-elementuen berritzea faseka egingo dute, "bidezubiaren segurtasuna eta erabilgarritasuna une oro bermatuz". Horretarako, aldi baterako egiturak eraikiko dituzte, ibilgailuen zirkulazioa eten gabe lan egiteko. Era berean, babes-neurriak ezarriko dituzte, balizko material erorketek azpian doan trenbidean, bidegorrian edo errepidean kalterik ez eragiteko.
Proiektuaren bigarren fasean honako lan hauek aurreikusten dituzte: habe nagusien sendotze- eta babes-lanak, drainatze-sistemaren berritzea, zoladuraren berritzea eta segurtasun-elementuen ordezkapena.
Bidegitik jakinarazi dutenez, proiektuaren helburua azpiegitura birgaitzea da, kanpoko aurreatezatuaren kableak ordeztuz, egituraren iraunkortasuna hobetuz eta monitorizazio-sistema bat instalatuz.
