Gipuzkoako 66 udalerritan garatuko dute lurraldeko nerabeei zuzendutako prestakuntza-programa berria, eta Debabarrena eskualdean hasiko da, Soraluzen zehazki. Hori dela-eta, Soraluzen aurkeztu zituzten atzo programaren nondik-norakoak. Aldundiko Gazteria zuzendari Isaac Palenciak eman zituen programari buruzko argibideak, Elgoibarko Udaleko Gazteria eta Hezkuntza teknikari Maialen Arangurenekin eta Soraluzeko Haur eta Gazteen zinegotzi Maite Quintanillarekin batera.
Lau gai-multzo; bi fasetan
Programak lau gai-multzo handi jorratuko ditu: ongizate emozionala, begirada kritikoa, sexualitatea eta bizitzarako trebetasunak, eta bi fasetan garatuko da: lehena, udaberrian, bost ikastarorekin, eta bestea, udazkenean. Soraluze, Deba eta Elgoibar izango dira ekimen hau hartuko duten lehen udalerriak apirila eta maiatza bitartean, sexualitateari, bizitzarako tresnei eta ongizate emozionalari buruzko ikastaroekin. Udazkenean, berriz, Mutriku eta Eibar batuko dira programara, begirada kritikoa eta ongizate emozionala jorratuz, hurrenez hurren.
Isaac Palenciak azpimarratu zuenez, oso garrantzitsua iruditzen zaie gazteen garapen pertsonala babestea, batez ere haien bizitzako une erabakigarrietan, hala nola haurtzaroan eta nerabezaroan. "Badakigu bizitzako etapa hori zalantza eta aldaketa askoko aldia izan daitekeela, eta, beraz, funtsezkoa da emozioak, autoestimua edo besteekiko harremana kudeatzeko tresnak izatea. Nabarmendu nahi dut gaur aurkezten ditugun hitzaldiak lurralde osoan garatzen dugun estrategia baten parte direla. Guztira 290 saio egiten ditugu, eta horien gaiak udal bakoitzarekin adostu dira, herri bakoitzaren beharretan oinarrituta".
Ongizate emozionala Elgoibarren
Maialen Arangurenek gazteen ongizate emozionalean eta buru osasunean jarri zuen arreta. "Euskadiko gazteen artean, 5etik 1ek osasun mentalaren alterazio bat du diagnostikatuta, eta azken urteetan antsiolitikoen kontsumoa 6rekin biderkatu da, batez ere nesken artean. Egoera horren aurrean, Elgoibarko Udalak Treba Nerabeak eta Treba Gazteak programetan parte hartuko du, herriko nerabe eta gazteei ongizate emozionalaren gaia lantzeko aukera eskaintzeko. Ekimen honen helburua egoera horiei erantzuteko tresnak ematea da. Gainera, Elgoibarko Udalak ere parte hartuko du zurrunbiloa.eus proiektuan. Proiektu horretan, herrian ikasten duten 12-16 urteko nerabeen ahotsa jasoko da, bai eta gazteek bizi duten egoerari eta buru-osasunari buruzko informazioa ere ".
Debabarreneko agenda osoa
- SORALUZE: Gaztelekua, apirilak 5 (17:00) Sexualitatea ezagutuz: emozioak, desira eta tratu ona.
- DEBA: Gaztelekua, maiatzak 8 (16:00-18:00) Bizitzarako trebetasunak: oinarrizko ikastaroa.
- ELGOIBAR: Gaztelekua, maiatzak 14 (18:00) Emozioak: oinarrizko ikastaroa.
- SORALUZE: Gaztelekua, maiatzak 17 (17:00) Aniztasuna eta afektuak: harreman osasuntsu eta askeak eraikitzen.
- DEBA: Gaztelekua, maiatzak 22 (16:00- 18:00) Bokazioa eta etorkizunerako erabakiak-hartzea.
- ELGOIBAR: Gaztelekua, urria Ongizate emozionala: kontzientzia eta gorputza.
- MUTRIKU: Urria Begirada kritikoa: oinarrizko ikastaroa.
- EIBAR: Urria Ongizate emozionala: kuadrilen saltsak.
- EIBAR: Zehazteko. Ongizate emozionala: oinarrizko ikastaroa.
- MUTRIKU: Zehazteko. Begirada kritikoa: Fake news.
Programarako prestatu duten agenda osoa gipuzkoa.eus loturan aurkituko duzue. Izen-emateak udalen eta gaztelekuen bidez kudeatzen dituzte; beraz, prozedurak ez dira berdinak herri guztietan. Xehetasun guztiak gipuzkoangazte.eus webgunean daude eskuragarri.
