Komedia bat den arren, irudi gordinak eta beldurrezko zinematik gertuago daudenak uztartzen ditu 26 minutuko film laburrak, eta efektu berezi ugari dituela da beste berezitasunetako bat. "Delicatessen filma datorkit burura, Tarantino eta Alex de la Iglesia nahastuta, zuri-beltzean", dio lan honetaz protagonistetako batek, Olga Martinez aktore santurtziarrak. Sorgin euskaldun baten papera antzezten du berak.
James Ferrux aktoreak jokatzen du Merkurio protagonistaren papera, Euskal Herrian emakume oso zaharrekin ligatzen duen gigoloarena. Sorgina ageri den eszenak Oñatiko kobetan errodatutakoak dira, eta ligatze kontuak Elgoibarko Jubilatuen Biltokian grabatu zituzten. Horregatik, figurante lanetan aritu ziren elgoibartar batzuk ere ezagutu daitezke filmean.
Filma egiteko inspirazioa euskal folkloretik eta mitologiatik lortu zuela dio Sebastien Pesle (Paris, 1992) zuzendariak. Basajaun da bere pertsonai mitologiko gogokoena. Parisen jaioa den arren, Hendaian bizi da Pesle.
Emanaldia eta mokadua
2024ko maiatzaren 18an estreinatu zuten Merkurio Parisen, eta, besteak beste, Sitges, Kordoba eta Donostiako zinemaldietatik igaro ostean, orain Elgoibarren ere egongo da ikusteko aukera, apirilaren 2an, 19:30ean, Elgoibarko Jubilatuen Biltokian. Bi eletan da filma, eta gaztelaniazko azpitituluekin emango dute. Filma ikusi ondoren mokadua ere izango dela aurreratu dute antolatzaileek. Era berean, jakinarazi dute egun horretan ezingo dela 16 urtez azpikorik joan filma ikustera, adinez nagusi direnentzako filma delako. Filmaren zuzendariak berak prestatu du filma emango duten pantaila Jubilatuen Biltokian eta emanaldira ere etoriko da aktoreekin batera.