Bi taldeek berdinketarekin konformatu behar izan zuten azken jardunaldian. Haundi emakumezkoen taldeak bana berdindu zuen Mintxetan Ostadar taldearen aurkako neurketan. Jaitsiera postuetan jarraitzen dute, 14. postuan, 16 punturekin. Puntu bat gehiago du Irauli Bostekok (15. postua) eta sei gehiago Hernanik (12. postua). Elgoibartarrek Beti Gazte (14 puntu) eta Ondarbeltz Mutriku (3 puntu) dituzte atzetik. Azken hiru sailkatuek galduko dute maila. Elgoibartarrek hurrengo jardunaldian izango dute jaitsiera postuetatik irteteko aukera berri bat, Zumaian, Zumaiakoren aurka jokatuko duten partidan. Liga bukatzeko bederatzi jardunaldi falta dira.
Haundi Vs Urola, Mintxetan
Gizonezkoen Haundi taldeak ere banako berdinketa ekarri zuen aurreko asteburuan Bergaratik, eta postu bat behera egin dute sailkapenean; azkenaurrekoak dira orain, 21 punturekin. Aloña Mendik eta jaitsiera postuetatik kanpo dagoen lehen taldeak ere, Beti Gaztek, 21 puntu dituzte. Postu bat gorago dagoen Hernanik, berriz, 25 puntu ditu. Horiek dira une honetan azken hiru postuak ekiditeko borrotan murgilduta daudenak, 11 jardunaldiren faltan. Haundik Urolaren aurka jokatuko du zapatuan Mintxetan (16:30). Zumarraga-Urretxuko taldea 11. postuan dago 28 punturekin. C.D. Elgoibarretik taldea animatzera joateko deia egin dute.
Erregionala sendo igoera fasean
Igoera fasea jokatzen ari den 1. mailako erregional taldeak garaipena eskuratu zuen etxetik kanpo, Gure Txokoa taldeari 1-2 irabazita Beran jokatu zuten partida. Bost jardunaldi jokatu eta gero, 10. postuan daude, 7 punturekin. Urnieta eta Alegiko Intxurre taldeak daude sailkapen buru, 11 punturekin. Hain zuzen, Intxurreren aurka jokatuko dute elgoibartarrek jardunaldi honetan, Mintxetan. Domekan izango da, 18:00etan.