Lehen Hezkuntzako seigarren mailako ikasleekin landu dute antzerkia tresna pedagogiko gisa erabiltzen duen ekimena, euskararen erabilera sustatzeko eta ikasleen artean trebetasun sozial eta artistikoak garatzeko helburuarekin. Proiektuaren oinarria da ingurune seguru eta kolaboratiboa sortzea, ikasleak askatasunez adierazteko, sormena garatzeko eta taldean lan egiteko aukera izan dezaten.
Sustatzaileen esanetan, programak hainbat gako ditu. "Lehenik eta behin, euskarazko ahozko adierazpena hobetzea du xede. Antzerki-jardueren bidez, ikasleek, praktikatuz, euskaraz berba egiteko gaitasuna hobetzen dute, hizkuntzaren erabilera formalaren oztopoak gaindituz eta komunikazio naturalagoa eta bat-batekoagoa sustatuz", azaldu dute. Gainera, berdintasun-harremanak sustatzen dituzte antzerkiak giro inklusiboa sortzen laguntzen duela-eta, "haur guztiek parte hartzeko eta lankidetzan aritzeko aukera izan dezaten, berdintasuna eta elkarrenganako errespetua balio gisa sustatuz". Era berean, proiektuak trebetasun sozialak eta artistikoak garatzen laguntzen du, eta hizkuntza-trebetasunak ez ezik, sormena, enpatia eta ikasleek talde-lanerako duten gaitasuna ere indartzen ditu.
