Oiartzungo Urkabe mendiko zirkuitoan jokatu zuten lasterketa infantil mailako txirrindulariek, biharamunean kadeteetatik gorakoek Euskadiko XC Txapelketa jokatu zuten zirkuito berean. Dorletako Ama txirrindularitza eskolako Aratz Larrañaga zihoan zapatuan lasterketa buruan, erakustaldia emanez, baina azkeneko itzulian katea irten zitzaion, eta hori ikustean, bigarren postuan zihoan Danel Garaizabal elgoibartarra gelditu egin zen helmugatik metro gutxitara, lagunari pasatzen uzteko. Hala, Aratz Larrañagak egin zuen lehenengo, Danel Garaizabalek bigarren eta Beñat Priegok hirugarren. Elgoibarko Lagun Taldeko Eneko Lameirasek ere jokatu zuen lasterketa hau, eta seigarren egin zuen sailkapen nagusian.
Garaizabalek erakutsitako kiroltasunak izan du oihartzuna. Podiumera igo zirenean ere goraipatu zuten izan zuen portaera.
Benjaminak eta alebinak Azkoitin
Bestalde, Azkoitin jokatu zuten errepideko lasterketan, Elgoibarko Lagun Taldeko hiru txirrindulari igo ziren podiumera. Benjaminetan, Iker Barrueta eibartarra, eta Alebinetan, June Iraolagoitia mendaroarra eta Irati Ansola elgoibartarra.
