Euskal giroa zerion gaur goizean Plaza Handiari. Bozgorailuetatik euskal musika entzuten zen bitartean, ikasle gazteak sokatiran, lokotx biltzen edo arraunean ikus zitezkeen. Denak taldetan banatuta, elkarren aurkako lehian. Horrela aurkitu dugu herriko plaza nagusia. Izan ere, Pilar Ikastetxeko eta Elgoibar BH eta Debako Mendata institutuko DBH-3ko ikasleek ari dira Euskal Soin Jarduera izeneko ekimenean parte hartzen. Duela pare bat aste DBH-4ko ikasleen txanda izan zen.
Euskal Soin Jarduera proiektua duela 7 urte sortu zen, Euskal joko eta jolasen inguruko jaialdiak sustatu eta zabaltzeko asmoz. Kutxak antolatu eta Gipuzkoako Ikastolen Elkartearen baitan dagoen Ikasiker taldeak sustaturiko jaialdi hauek Gipuzkoako herri gehienetan burutzen dira.
Jaialdien helburuak ondorengoak dira:
• Euskal joko eta jolasak indartzea.
• Euskara eta jolasa komunikatzeko tresna hezitzaile bezala lantzea.
• Euskal kulturaren trasmisioa garatzea.
• Herri desberdinetako pilotaleku eta plazak alaitzea.
• Ikastola eta ikastetxeen arteko harremana sendotzea.
• Munduko jolasak atalaren barruan, kultur aniztasuna lantzea.
• Eta batez ere ondo pasatzea.
|
|
|
