1991n etorri zen Elgoibarrera
Kadete mailako Munduko Xake Txapelketa irabazi berritan iritsi zen Topalov gaztea Elgoibarrera, 16 urteko mukizu bat besterik ez zela eta gazteleraz berbarik egin gabe. Herrialde eta hizkuntza arrotzekin topo egitea, baina, ez zen oztopo izan xakelari gaztearen talentuarentzat.
Elgoibarko lehen bi edizioetako txapeldunorde
Pronostikoguztiak zapuztuz, Topalov-ek bigarren postuan sailkatzea lortu zuen, Zenon Franco paraguayarraren atzetik eta Elizbar Ubilava maisu georgiarraren aurretik. Elgoibarko Xake Txapelketa bera ere, urte hartan, 1991n, estreinatu zen. Hurrengo urtean, 1992an, errebantxa bila itzuli zen Topalov Elgoibarrera. Berriz ere bigarren postuarekin konformatu beharra izan zuen, Ubilavak irabazi baitzuen urte hartakoa. Gerora garaipenak errenkan etorri ziren.
Rankinean onena
Munduko xakelaririk onena da Vesselin Topalov, bera baita xakeko munduko rankinean punturik gehien dituena: 2813 Elo maila du. Gazteleraz berba egiten ere ikasi du, Salamancan bizi baita. Iaz Argentinako Munduko Xake Txapelketa irabaztea lortu zuen arren, badu arantza bat: aurten ezin izan du Munduko Txapelketa bateratua irabazi.
Munduko Xake Txapelketa bateratuko finala galdu du
Topalov-ek, Vladimir Kramnik errusiarraren aurrean galdu zuen txapela. Elistan (Errusiako Kalmikia Errepublika budistako hiriburua) jokatu zen txapelketak, gainera, ohikoa baino balio handiagoa zuen. 1993. urtean Gary Kasparok handiak bultzatu eta sortarazi zuen zismaren ondorioz, federazio ezberdinak banandu ostean, aurtengo
txapelketa izan da bateratuta jokatu den bakarra.
Egunotan Bilbon dago Topalov
Munduko Itsukako I. Xake Txapelketan parte hartuko du Topalovek Bilboko Guggenheim museoan, abenduaren 7tik 9ra bitartean. Judit Polgar historiako emakume xakelaririk onearen aurka neurtuko ditu indarrak bulgariarrak. Biak taula ikusi gabe arituko dira. Jadanik Bilbon da Topalov eta txapelketaren aurkezpenean, aldi berean hiru partida jokatu zituen itsuka Julen Gerreroren, Antxon Luengo txirrindulariaren eta Critino Burgoa, Euskadiko
ONCEko zuzendari orokorraren aurka.
→Informazio gehiago:
Eusko Sare
Berria
XVI. Elgoibarko Nazioarteko Xake Txapelketa
• Abenduaren 11tik 17ra Kultur Etxean
• Partiden ordutegia: 16:00etatik aurrera
