Durangoko Liburu Azokan salgai
Gaztelupeko Hotsak disketxetik jaso zuen Arima Beltza taldeko abeslariak Rory Gallagher blues izarrari buruzko liburua idazteko proposamena. "Asko maite dudan musikaria da, eta berari buruz euskaraz idazteak ilusio handia egiten zidan". Honez gain, Gallagherri buruz “ezer gutxi, eta dagoen apurra ingelesez”, idatzi delako onartu zuen gonbidapena. Arrazoi gutxi ez balira ere, Euskal Herriarekin lotura berezia mantendu zuen Gallagherrek, 5 kontzertu eskaini baitzituen (Donostian birritan, Irunen, Hendaian eta Lekeition) eta “jarraitzaile sutsuak laga zituen gure artean”.
Kemena eta leialtasuna
“Zuzeneko emanaldietan erakusten zuen kemena, karakterra, eta bere musika ideiekiko zuen leialtasuna” dira Gurrutxagaren iritziz Rory Gallagherren ezaugarri nagusiak. Horregatik izenburua. “Horrenbesteraino zen bere ideiekiko leiala, non Rolling Stones taldean sartzeko aukerari ere ezezkoa eman zion”.
Roryren anaia elkarrizketatu zuen Londresen
Donal, Rory Gallagherren anaiarengana jo zuen Gurrutxagak informazio bila, “Berari buruz idatzi diren liburu eta aldizkarietatik dokumentazioa eskuratu ostean, Donal Galagher elkarrizketatzera Londresera joan nintzen. Bere etxean hartu ninduen honek, eta 3 egun pasa nituen bertan. Roryk egindako musika zabaltzeaz arduratzen da orain Donal, beraz, oso prest agertu zen. Berarekin hitz egiteaz gain, Roryren taldekideekin egoteko aukera ere izan nuen; armonika jolea eta Roryren gitarra zaintzen zuenarekin egon nintzen”. Honez gain, Euskal Herrian eskaini zituen kontzertuen kronikak egin ditu kontzertuen antolatzaileekin eta ikusleen artean egon ziren musikari euskaldun batzuekin (Anje Duhalde, Txomin Artola…) berba egin ostean.
Informazio gehiago:
*Rory Gallagher: Biografia eta elkarrizketak (ingelesez)
*Albumak eta abestiak mp3 formatuan (ingelesez)