Peruko haurrak eskolatzeko 24.774 euro batu ditu ‘Miski’k 2006an

elgoibarren.net 2007ko urt. 23a, 10:07

Otsailaren 27an joango da Gemma Agirregomezkorta, Miski elkarteko “alma mater”a, Cuscorantz (Peru). Bi hilabeteko egonaldia egingo du eta bertako haurrak eskolatzea izango da elgoibartarraren zeregina. Horretarako, herritarrek borondate onez emandako 24.774 € eramango ditu berarekin.

Cuscon (Peru) martxo hasieran hasten dira haurrak eskolara joaten. Zoritxarrez, ordea, haur guztiek ez dute eskolara joateko aukera edo baliabiderik. Gizaki orok merezi duen hezkuntza eskubidea eskaintzen saiatuko da Miski, denei ezin bada ere, gutxienez, haur batzuei.

24.774 euro batu ditu Miskik 2006an

1706641931944 Peruko haurrak eskolatzeko 24.774 euro batu ditu ‘Miski’k 2006an

Une honetan Miskiren zerrendan dauden haurrak eskolatzeko 20.000 euroko aurrekontua behar du Gobernuz Kanpoko Erakundeak, eta honi, bidaiaren eta bertako egonaldiaren gastuak gehitu behar zaizkio.

2006ko Kanpainan batutako diru kopuruari (13.054 €) bazkide eta besoetakotzeen bidez jasotakoa (11.720 €) gehituz gero, 24.774 euro da azken emaitza. Hortaz, haurren eskolatzeari aurre egiteko diru nahikoa eramango du Gemmak Peru alderantz.

2006ko kanpainan 13.054 € batu ditu Miskik. Batez ere, rifak saltzetik eta jendearen laguntzen bitartez.
1- 7.146 € (ekainetik abuztura)

2- 5.908 € (urritik urte bukaerara arte)

43 besoetakotze eta 10 bazkide
Peruko haur baten besoetako egiteko 18 eta 25 € bitartean jarri behar ditu hilero aita besoetako bakoitzak, eta haurraren familiak osotasunean jasotzen du dirulaguntza hau. Une honetan dituen 43 besoetakotzeei esker, 10.380 € biltzen ditu urtean Miskik
Bestalde, 10 bazkideek 3 eta 18 € artean jartzen dituzte hilero, hau da, 1.340 € urtean. Gauzak horrela, besoetakotze eta bazkideen dirua batuz gero; 11.720 € jaso zituen Miskik 2006an

Gemmaren esker ona

1706641932012 Peruko haurrak eskolatzeko 24.774 euro batu ditu ‘Miski’k 2006an

Elgoibarko herria orokorrean eta “jatetxe, taberna, bazkide eta dirulaguntzak eman dituzten guztiak eskertu” nahi izan ditu Gemma Agirregomezkortak. “Baita Elgoibarko Udala eta Medalla de la Milagrosa elkartea ere. Errifak dohainik egin dizkidaten Arrillaga inprentakoak eta errifak erosi dizkidaten Herriko Ikastetxeetako (Herri Eskola, Ikastola, Pilar eta BH Institutua) ikasleak ere ez ditut ahaztu nahi. San Lazaro egoitzako lagunei ere eskerrik zintzoenak besoetakotze egin duten haurragatik, eta azkenik, mila esker bihotzez azken bi urteetako aurrekontua osatzeko ezinbesteko laguntza eman didan familia elgoibartar horri, beraien laguntzarik gabe ezin izango baikenien gastu guztiei aurre egin”.

Gizartea Elgoibar