Zapatuan inauguratuko dute Idotorbeko bolatoki berria

Idotorbe San Pedroko auzotarrek bolatoki berriaz gozatzeko aukera izango dute aurrerantzean. Jesus Mari Azpiazu auzo-alkateak akorduan dauka aurreko bolatokia "auzolanean eta Udalak lagatako materialekin“ eraiki zutela duela 30 urte inguru. Azken urteetan, baina, baldintza oso eskasetan zegoela aitortu digu. “itoginak, zoru gorabeheratsua... bolatoki bat baino bertan behera lagatako txabola bat gehiago ematen zuen ”.

Egurrezko teilatua eta argi instalazio berria
Uralitazko teilatuak bi isurkiko egurrezko teilatu ederrari egin dio lekua. Buztin lurrez eginiko zoru berria ere jarri diote bolatokiari, eta baita, argi instalazioa ere. Berrikuntza lanek 30.000 euro inguruko kostua izan dute.

 

 

Inaugurazioa martxoaren 10ean (zapatua)
•    Eguerdian bazkaria egingo dute bolatokia berria egiteko lanean jardun duten guztiek.

•    17:00etan Bolo Txapelketa hasiko da. Euskadiko Hiru Txirlo Bolo Txapelketa martxoaren 16an hasten denez, sasoian jartzeko aukera polita edukiko dute, hortaz, herriko bolariek.

Pilotaleku estali eta soziedade berria, hurrengo helburuak

Azpiazuk azaldu digunez, bolatoki berriarena auzoan egitea aurreikusten dituzten berrikuntzetako bat besterik ez da. Izan ere, Idotorbeko pilotalekua estaltzea eta auzotarrak elkartzeko soziedade bat eraikitzeko asmoa adierazi diote Udalari. “Aurrekontu handia eskatzen duten lanak dira, ordea, urratsez urrats egin beharrekoak. Momentuz bolatokiarekin hasi gara. Ezker paretako frontoi berri bat egitea zen gure hasierako asmoa, baina diru asko behar zela ikusi genuen".

Auzotarrentzako soziedadea, berriz, frontoiaren atzealdeko frontoitxo txikia dagoen lekuan eraikiko luketela aurreratu digu Azpiazuk.