Lau elgoibartarrek Vall Fosca eski proban parte hartu dute Katalunian

elgoibarren.net 2008ko ots. 19a, 11:01

Euskadiko Koparako puntuagarria den hirugarren proba gure mugetatik urrun xamar, Kataluniako Vall Fosca haranean, jokatu zen zapatuan (otsailak 16). Proba hau bikoteka egiten da eta izena eman zuten 166 bikoteetako bi elgoibartarrak ziren. (bideoak eta argazkiak dauzka)

Vall Fosca adiskidantzan oinarritutako proba dela dio Arkaitz Iruretak, “bikoteko bigarrenak eginiko denborak hartzen dira kontutan eta elkar laguntza ezinbestekoa da”. Arkaitzekin batera, Iker Leonardo, Joseba Elustondo eta Iñigo Lariz elgoibartarrek parte hartu zuten Vall Fosca haran zoragarrian egin zen proban.

Antolakuntza perfektua

Iker Leonardo ahalegin betean.

Azken bi asteetan ia elurrik bota gabe eta tenperatura oso altuak egin eta gero, “elur gutxi eta kalitate eskasekoa” aurkitzea espero zuten arren, “antolakuntzak bete betean asmatu zuen lasterketaren nondik norakoarekin, eta esperotako 1600mtako desnibela barik, 1800mtik gorako desnibel positiboa egin genuen” azaldu du Arkaitz Iruretak.
Laurek lasterketa polita, baina aldi berean gogorra izan zela Vall Fosca aitortzen dute, baina, batez ere, antolatzaileen lana goraipatu nahi izan dute “Hamarreko bat merezi dute. Ia igoerako ibilbide guztia bi arrastorekin markaturik zegoen (beste korrikalariak aurreratzeko oso garrantzitsua da bi arrasto egotea). Gainera aldaketak eta zailtasuneko lekuetan antolakuntzako jende mordo bat zegoen laguntzeko prest. Eta zer esan tontorretan animoak ematen zegoen jendeaz”.
Antolakuntzaz gain inguruak ere goraipatu dituzte: “ikusgarria da, oraindik esplotatu gabekoa, oso naturala”.

Eguraldi zoragarria

Joseba Elustondo, ilarako lehena, aldapa gogorrean gora.

Eguraldiaren kexarik ez dute izan lau eskiatzaile elgoibartarrek: “eguraldi zoragarria egin zigun. Korritzeko tenperatura egokia, bero gehiegirik gabe, eta jaitsieretan katalanez esaten duten moduan: 'baixada amb neu pols' , alegia, elur hautsa”.
Euskadiko Koparekin amaitzeko, Andres Regil sarian parte hartu nahi dute elgoibartarrok martxoaren 1ean eta 2an Picos de Europan. Halere, momentuz itxaron zerrendan ei daude. Zorterik ez badaukate Morkaiko Mendizale Elkarteak antolatu duen mendiko eski irteeran akabatuko dutela harra azaldu digute, “ia jende dexente batzen garen, Elgoibarren sekulako gorakada eduki baitu kirol honek”.

∞ Lotura duten albisteak: