EGA ez da oso popularra gure artean, egia esatera. Izan ere, ikasleok nahiko nazkatuta gaude egiten dugun gauza bakoitza titulu batekin frogatu beharraz. Eta EGAren kasua ere bide horretatik doalakoan nago. Gainera, ez dut uste azterketa honekin pertsona batek euskaraz komunikatzeko duen gaitasuna ongi neurtzen denik, ez gutxienez atariko proban. Oilarrak kukurruku eta eskopetak danba-danba egiten dutela baino gauza garrantzitsuagoak badaude nire iritziz euskarari dagokionez. Baina, helburua da galbahea frogara aurkeztutakoen erdiak soilik pasatzea, eta horretarako errazena test erako azterketa egitea da.
Okerrena da ordea, lana topatzeko orduan zenbait ate ixten dituela EGA ez izateak. Ni ez nago zerbitzu publikoetan lana egiten dutenei euskaraz jakitea eskatzearen aurka, ezta gutxiago ere. Baina euskaraz jakitetik EGA gainditzera pausu bat dago. Eta gazteleraz ez badugu horrelako titulurik atera behar, zergatik bai euskaraz?
Egia da halere, titulua lortzea zaila izan arren, gazte askok eta askok ez dutela euskaraz hitz egiteko batere erraztasunik. Bigarren hezkuntza bukatzean euskaraz eta gaztelaniaz ganoraz komunikatzeko gai izan behar genuke, eta hori ez da horrela gaur egun. Zerbaitek huts egiten du beraz, ez dago zalantzarik.