Elgoibarko kanporaketaren kronika
Saioa, gaueko 22:30tarako aurreikusita bazegoen ere atzerapen apur batekin hasi zen Jon Katalo gai jartzailearen gidaritzapean. Ederki bete zuen bere lana Jon-ek, gaiak ondo azalduz eta saioa naturaltasunez gidatuz.
Afaltzen elkartu ziren eta saioa entzutera hurbildu ziren bertsozaleei esker giro polita zegoen Elgoibarko Gaztetxean, bertsotarako leku aproposa ezpairik gabe.
Bertsolariei dagokienez, txispa haundirik gabe aritu zirela esan behar, tarteka ideia dizdiratsu edo erantzun dotoreak izan baziren ere. Ofiziokako lanetan aritu ziren egokien bertsolariak eta bertan Jokin Labayen Arrasatearra eta Xabat Galletebeitia Lekeitiarra nabarmendu ziren, lehenengoa erantzuten erakutsi zuen erregulartasunagatik eta bigarrena bere idea originalak bertsotara modu dotorean eramateagatik. Nabarmentzekoa Hodei Iruretagoiena Zarauztarrak eta Xabat-ek koplatan eginiko saioa, erantzuna arrazoiari lotuz eta umore puntua gehituz saio borobila egin bait zuten, saioko gogoangarriena. Xabat bakarkakoan ezinean aritu zen ordea eta behera egin zuen. Aipagarria Egoitz Alkorta Mutrikuarrak erakutsi zuen erregulartasuna, bertsoak goitik behera ederki osatu zituen, baina ideia fresko falta nabaritu zitzaion. Bestetik, Maialen Velarde eta Maddi Gallastegi Zumaiarrak euren onenean aritu ez arren, entzulea harrrapatzeko gaitasuna erakutsi zuten.
Aurtengo Plazatik Gaztetxerako berritasuna, saioko irabazlea aukeratzeko orduan etorri zen. Epaileek emaniko epaiaz gain, entzuleak bertsolari gogokoena aukeratuz norbere bozka eman behar izan zuen. Entzuleek aukeratutakoa (Hodei) eta epaileen epaiak zioena (Jokin) bat ez zetorrenez, buruz-burukoa jokatu zuten elkarren aurka hamarreko txikian ofizioka. Azken saio honetan Jokin gailendu zen eta bide batez Mutrikuko gaztetxean jokatuko den finalerako txartela lortu zuen.
• Azken sailkapena:
- Jokin Labayen 196 (Finalera zuzenean sailkatua)
- Hodei Iruretagoiena 192,5
- Egoitz Alkorta (Beano) 190
- Xabat Galletebeitia 182,5
- Maialen Velarde 175,5
- Maddi Gallastegi 166,5
Hurrengo saioa, datorren ostiralean, Maiatzak 16 Debako gaztetxean izango da. Afaria 21:00etan eta saioa 22:30etan.