Mailaketa probetan parte hartu nahi dutenek, 637 990 159 edo 670 665 797 telefonoetara deitu edo Kiroldegian eman dezakete izena. Interesatua dagoen edonor, Irailaren 24an, asteazkena, Mintxetako tenis pista berrian, arratsaldeko 6retatik aurrera egingo den proba saiora ager dadila, raketa eta guzti. Ikastaroetan parte hartzeko 36 euro ordaindu beharko dira hilean, eta aldagelak eta dutxak erabiltzeko aukera izango da.
Ander Oñederra elgoibartarra (Tenis irakaslea) eta Jonatan Taborcia ondarrutarra (entrenatzaile nazionala) izango dira ikastaroko irakasleak. Taborcia Euskadiko tenis txapeldunordea da eta ondarrutarra izan arren ederki ezagutzen du Elgoibar, IMHko pista bereziki, bertan eman baitzituen lehen pausoak tenis munduan. Saio teknikoez gain prestakuntza fisikoa ere landuko da eta klaseak astean bi egunez izango dira Mintxetako eta IMHko tenis pistan. Saio bakoitzak ordu beteko iraupena izango du.
Lankidetza hitzarmena
Bestalde, Udal Kirol Patronatuak eta 40-15 Tenis Elkarteak 2008/09 denboraldirako lankidetza hitzarmena sinatu dute. Horren arabera, martitzen eta eguenetan Mintxetako tenis pista erabiltzeko eskubidea izango du elkarteak, eta gainontzeko egunetan IMHkoa.