New Yorkeko kaleetan barrena egiten den New Yorkeko maratoia kirol proba baino gehiago dela dio Santosek: “edonori gomendatuko niokeen esperientzia da, denbora kontuan eduki gabe. Denori ezagunak egiten zaizkigun auzoetako: Harlem, Bronx, Queens… bide bazterretan hainbeste gauza ezberdin ikusten dituzu, horrenbeste estimulu heltzen zaizkizu, dena xurgatzeko denborarik ez dizula ematen”.
Daukan fama merezitakoa dela frogatu du Santosek. “Ibilbide guztian dago jendea, eta animoak ematen denbora guztian. Antolakuntza ere primerakoa da. Erloju baten antzera funtzionatzen du denak, akatsik gabe”. Hiria eta antolakuntzan diharduten ehunka lagunen inplikazioak harritu du, “imagina ezin ditzakezun detaileak ere zenbateraino zaintzen dituzten ikustea sekulakoa da!”. 42 kilometroko ibilbidean 107 musika banda, raperoak eta gospel taldeak Broklynen, cheerleader edo animatzaileak, edozer aurki daiteke New Yorkeko maratoiaren ibilbidean.
Dagoen kirol probarik gogorrenetarikoa da maratoia (42 km. Eta 195 metro egin behar dituzte antxintxikariek!), baina, maratoia egin bitartean gozatzeko aukerarik badagoela ziurtatzen du Santosek: “Lehenengo 25 kilometrotan gozatu nuen, eta asko gainera. Maratoi erdian ordubete eta 22 minutuko denbora neraman, baina hortik aurrera oso zaila da norbere buruaren sufrimendutik atera eta inguruan gertatzen denari kasu egitea. Azken hamar kilometrotan, kritikoenak, nahikoa daukazu aurrera begiratzearekin”. Erronkaren zailtasuna gutxi ez eta lesionatu egin zen Santos 30. kilometroan. “Orain dela bi hilabetetik mina nuen txorkatilan eta 21. kilometroan ziztatua nabaritu nuen aldapa bat igotzen ari nintzela. 30. kilometrorako mina jasangaitza zen eta handik aurrera oinez egin nituen zati asko, mina baretzeko modu bakarra baitzen”. Erlojuaz ahaztea erabaki zuen orduan. “Zer demontre! pentsatu nuen. New Yorkeko maratoian nago, lesionatu nintekeen lekurik onenean. Joan nintzenean banekien zer zegoen, baina gauza bat da jakitea eta beste bat bizi izatea. Hainbeste gauza ezberdin, hainbeste estimulo heltzen zaizkizu, ez dizu astirik ematen dena xurgatzeko. Hau edo hori ikusi eta nire buruari esaten nion, ‘hortaz gogoratu behar nauk gero kontatzeko’.
Azkenean, gainera, denbora ona eginda ailegatu zen helmugara, 3 ordu eta 11 minutu; 40.000 parte hartzaileetatik 1.900. postuan gutxi gorabehera.
Duela hiru urte hasi zen Imanol Santos antxintxika egiten. Ordutik hona ia egunero joaten da saltaka egitera, hutsik egin gabe, eta hainbat probatan parte hartzen du. Iaz egin zuen estreinako maratoia, Donostikoa. Bi ordu eta 58 minutuan egin zuen.
Duela hiru urte hasi zen Imanol Santos antxintxika egiten. Ordutik hona ia egunero joaten da saltaka egitera, hutsik egin gabe, eta hainbat probatan parte hartzen du. Iaz egin zuen estreinako maratoia, Donostikoa. Bi ordu eta 58 minutuan egin zuen.
