- Eguna: abenduak 15, astelehena
- Ordua: 19:30etan
- Lekua: Elgoibarko Kultur Etxeko hitzaldi aretoan.
Gaian sakontzeko
∞Ikus hemen:
- Xabier Odriozola: "Berdintasunarekin denok ateratzen gara irabazten" (mondraberri.com)
- Ibon Arrizabalaga: "Gizonok bizitza errazagoa dugu, baina ez hobea" (pdf)
- Luis Cerron: “Berdintasunik ez dagoenean indarkeria sortzen da”
Xabierren berbak erabiliz, gizonen sexismoa deseraiki nahi da. Duela 30 urte, berdintasunaren gaineko diskurtsoa: "Gizonezkoek berdintasunarekin dena galtzeko dutela" bazen, hiru hamarkada beranduago, alderantzizkoa da, hots, "berdintasunarekin denok dugula zerbait irabazteko".
Xabierrek berak gizontasun edo maskulinitate berriei buruz jardungo du. Nola historian zehar jaso ditugun baldintzapenek gizonezkook rol zehatz batzuen jabe egin gaituzten eta ondorioz, zer motako rolak jartzen ditugun abian gizartean; bai emakumeekin, bai gizonezkoekin nahiz haurrekin. Rol horien eragina ikusi eta gero, informazioaz jabetu eta kontzientzia hartuaz, denborarekin, aurreiritzi eta jokabide zaharrak alde batera utziz, beste jokabide batzuk hartzea proposatzen da: berdintasun zaleak, demokratikoak...
Neu, berriz, hezkuntza munduaren esperientziatik abiatzen naiz. Berdintasunari buruz berba egiterakoan heziketaren garrantziaz ohartzen gara. Denok ados gaude: eskola eta etxeetan hasi behar da. Baina hor arazo batekin topo egiten dugu: eskola eta etxeetan baloreak transmititzen dituztenak... pertsonak dira. Eta pertsona horiek, aurreiritzi, jokabide eta rol sexisten artean haziak izan dira. Hortaz, eskolan eta etxeetan ondorengoei zerbait berririk pasa nahi badiegu, aldaketak, ezer baino lehen, guk geuk geureganatu eta barneratu beharko ditugu.
- Matxismoa eta emakumeen aurkako indarkeria arazo larria dira, baina noren arazoa? Gizonona? Gizonok dugu arazoren bat? Ala gizartearena da arazoa?
Arazoak aurpegi ezberdinak ditu.Alde batetik, emakumearen aurkako indarkeriak ondorio eta arazo latzak dakarzkie jokabide hori jasaten duten emakumeei. Hori da alderdirik garrantzitsuena eta ezabatu behar den lehena.
Bestetik, matxismoa, jarrera bezala, besteen gainetik batzuen boterea mantentzeko saiakera bat besterik ez da: arrazakeria, homofobia, fanatismo erlijioso, ideologikoa, neoliberalismoa e.a. diren antzera. Arazoa denona da, gizartearena.
Jarrera guzti hauek desoreka sortzen dute gizartean. Eta berdintasunik ez dagoenean indarkeria sortzen da: alde batetik zapaltzaileak zapaltzen jarraitzea nahi duelako eta zapaldua sentitzen denak defendatzea nahi duelako. Arazoa gizartearena baldin bada, ondorioz, gizartea osatzen dugun norbanako bakoitza ere arazoaren zati eta parte dela esan daiteke. Eta berdin erantzukizunetaz ari garela ere.
- Berdintasunerako jarrera azaldu izan duzu behin baino gehiagotan ("Friego luego existo", "Gizonduz"en aldeko jarrera zure blogean…). Gizonok zerbait egin dezakegu? Zer?
Hasteko, bakoitza, bizitzea tokatu zaigun denbora eta kulturaren ondorio bat garela onartu. Norberak bere balore, aurreiritzi, eskema, jarrera eta pentsamenduen birplanteamendu sakon bat egin. Emakumeekiko harremanetan, berdintasun jarrerak izateko behar diren pausoak gauzatu. Emakumeek sexismoaren aurka aldarrikatzen dituzten planteamenduak babestu, berbaz bakarrik ez, aktiboki eta publikoki ere elkarlana adieraziz. Genero-indarkeriaren aurka tolerantziarik ez adierazi. Heziketa funtsezkoa izanik, gure haurrak txikitatik hezi beharko genituzke berdintasunean. Honek haurrekin harremanetan dauden pertsonek aldaketarako kontzientzia tinko eta erabakigarria izatea eskatuko luke.
-Zer iruditzen zaizu Gizonduz ekimena?
Prozesu honen barruan beste instrumentu bat da. Instituzio ofizialek onartua eta babestua izanik agian bere oihartzun eta eragina urrutixeago iritsi daiteke. Emakundek bultzatutako iniziatiba honek berdintasunaren esparruan oraindik egiteko asko dagoela garbi utzi nahi du. Eta prozesu honi bultzada bat emateko gizonen inplikazio zuzena ezinbestekoa da. Horregatik, formazio eta sentsibilizazioa lortzeko lan gogor honetan, ekimen honen bitartez, neurriak eta tresnak eskaini nahi dira, gizonezkoen artean masa kritiko ahalik eta sendoena lortuz benetako berdintasunaren bidean mugitzen has gaitezen.