•Hirugarrengoan ere ezin Loiolak
San Anton Pilota Torneoan finalera iritsi den hirugarren aldian ere ezin izan du Eneko Loiolak horrenbeste desio duen txapela jantzi. Atxotegi plaentxiarrak eta atzelari elgoibartarrak 12 eta 22 galdu zuten Muguruza eta Jauregiren aurka. Indarrak parez-pare hasi zen norgehiagoka, baina bosnako berdinketaren ostean, Muguruza eta Jauregi Lagunak Taldeko bikotea baino gehiago izan zen, bakoitza bere esparruan. Jauregi atzelariak partida –eta txapelketa- aparta jokatu ditu eta bera aukeratu zuten finaleko jokalari onena. Muguruza aurrelari bergararrak Jauregiren domeinua gauzatu zuen aurreko koadroetan. Gantxo ikusgarriak sinatu zituen.
Promesa mailan, nagusien partidako emaitza berdina errepikatu zen. Jaunarenak eta Zabaletak 22 eta 12 irabazi zieten Gorkari eta Merinori. Gehiago espero zen errioxarretaz, Gorka aurrelariaz, bereziki, baina ez zituen usteak bete. Soraluze eta Bergarako pilotariak tartean izanik, sarrera ederra izan zuen Ikastolako frontoiak. Pilota gehiago ikusteko goseaz geratu ziren pilotazaleak, horrelakoetan ohi denez, baina aurtengo San Anton Torneoak eman du berea.
|
|
|
|
|
|
•Gure Bide eta Zubi Ondo elkarteei omenaldia
Altzolatarren Dorretxekoek Gure Bide eta Zubi Ondo elkarteen 50. urteurrenari eskainitako zigilu erakusketa antolatu dute aurtengoan. San Anton Egunean inauguratu zuten eta urtarrilaren 25era bitartean egongo da ikusgai Kultur Etxeko erakusketa aretoan. Hamaika bilduma osatzea lortu dute aurtengo zigilu erakusketan, gai anitzetakoak: txirrindularitza, euskal marinelak, aire posta, gazteluak, Austria, telefonoa, trena, Ferrari, teknologia berriak, Galizia eta bere ardoak eta uraren semeak.
- Erakusketa ikusteko ordutegia: Astegunetan, 19:00etatik 21:00etara. Jai egunetan, 12:00etatik 14:00etara eta 18:00etatik 21:00etara.
|
|
|
|
•Alberdi eta Arriola 'Koloretan' Txapelketako irabazle
Berrogei lagunek, 15 bikotek eta 10 norbanakok, parte hartu zuten estreinako Koloretan mahai-joko txapelketan. Julene Alberdi eta Ibon Arriolak gure herria oso ondo ezagutzen dutela erakutsi zuten partxisa eta tribiala uztartzen dituen jokoan, eta beraiek izan ziren 500 euroak irabazi zituztenak. Naiara Martin eta Ane Odria sailkatu ziren bigarren postuan (300 €) eta Andoitz Agirregomezkorta sailkatu zen hirugarren postuan (150 €).
Antolatzaileak gustura geratu dira lehen esperientzia honekin, “giro aparta egon zen parte hartzaileen artean eta ikustera ere jende asko hurbildu zen Kultur Etxeko sotora”. Gauzak horrela, datorren urterako bigarren edizioa prestatzen dihardutela aurreratu dute Elgoibarko Izarrako arduradunek.
|
|
|
|
|
|
|
|
