Honako hau izango da tokiko inbertsioak egiteko estatuaren fondotik (Ia bi milioi euroko laguntza emango dio Estatuak Udalari inbertsioetarako) etorriko den diruarekin egingo den estreinako obra.
Injelan enpresak idatzitako proiektuari esker, “Urasandi auzoaren gainekaldean dagoen Urtiako biltegitik erdi bidean jarriko diren guneetaraino ura eramango duen erdiko sarea instalatuko da” Elgoibarko Alkate Alfredo Etxeberriak azaldutakoaren arabera.
Obra gauzatzeko sei hilabeteko epea izango du, gehienez, enpresak. Aurrekoaz gainera, 2010eko urtarrilaren 1erako amaituta egon beharko dute lan guztiek, hori baita estatuaren fondoetatik laguntzak jasotzeko baldintzetako bat. Gero, proiektuaren bigarren zatian, erdiguneko banaketa saretik hala eskatzen duten baserrietaraino zabalduko da ur hornidura sarea.
- Informazio gehiago: Gipuzkoako Aldizkari Ofiziala
Gaur egun Aiastia auzoko bizilagunek baserri inguruetan dauden iturburuetatik eskuratzen dute edateko behar duten ura, baina lehorte edo euri gutxi egiten duen sasoietan arazoak izan ei dituzte. Urtiako ur biltegitik baserrietara ura zabaltzeko sarea osatzen dutenean arazo horiek gainditzea espero dute. Baserritarren aspaldiko eskaera izan dena, inbertsio handiekn beharrak atzeratu dute gaurdaino.