Tayuta japoniarrekin eskainiko du kontzertua Napoka Iriak otsailaren 15ean

 

 

 

Japonia-Euskal Herria konexioa

  Japonia eta Euskal Herriko musika talde batzuen artean sortu den adiskidetasun harremanari esker, bi musika talde japoniarren bisita jaso dugu azken hilabeteotan. Joan zen urrian Tex & the Sun Flower Seed musika talde japoniarrak hamar eguneko bira txiki bat egin zuen Euskal Herrian, eta kontzertutik kontzertura zebiltzan bitartean Elgoibarren hartu zuten ostatu; izan ere, Jabi Quintano elgoibartarra zen Fight For Rights Basque Tour 2008 izeneko biraren ekoizleetako bat.
  Napoka Iriakoek joan zen udazkenean itzuli zieten bisita japoniarrei, Azaroaren 28tik abenduaren 8ra bitartean sei kontzertu eskaini zituzten Ekialdeko Asiako herrialde urrunean (*BIDEOA: Napoka Iriak 2008an Japonian egin duen biraren bideoa). Bertan egin zuten egonaldian eta kontzertuetan Tayuta taldearen babesa eta laguntza jaso zuten euskaldunek, eta ordainetan, beraiek dira orain Euskal Herrira etorri direnak. Napoka Iria eta beste talde euskaldun batzuekin batera kontzertuak eskainiko dituzte hainbat lekutan, horietako bat, azkena, Elgoibarren.
•Bakea eta natura

  Tokyon, Japoniako hiriburuan sortu zen Tayuta taldea 2004an, proiektu eta talde ezberdinetatik zetozen Hirono (ahotsa), Masa (perkusioa) eta Isaku (gitarrak) elkartu zirenean. Taldeak bakea eta natura ditu gai nagusi abestietako hitzetan, Japoniako taldeen artean oso ohikoa ez dena. Letrok soul, afro edo world music moduko doinuekin janzten dituzte. Bestalde, zuzeneko armoniatsu bati esker, Tayutak segituan lortu zuen ospea Japoniako eszenan eta bertako musikari ezagunenekin ere igo dira taula gainera.

• Tayutaren webgunea
• Entzun Tayuta Myspacen

  
Tayutaren kontzertuak Euskal Herrian:

• Otsailak 7: Beasaingo Gaztetxean Kokein eta Layo Raser taldeekin batera
• Otsailak 8: Irungo Orkatzen
• Otsailak 12: Donostiako Le Bukowskin Napoka Iriarekin batera
• Otsailak 13: Elorriko Ateneon Transalpinekin batera
• Otsailak 14: Eskoriatzako Inkernun Napoka Iriarekin batera
• Otsailak 15: Elgoibarren Napoka Iriarekin batera