Sallobenteko inguruak Debabarrenako txokorik gustukoenen artean

elgoibarren.net 2009ko ots. 17a, 15:07
Deskargatu Info Ahotsak :
es en fr

 
Debabarrenako txokorik gustukoenak zein diren jasotzeko asmoarekin lehiaketa antolatu du Debegesak, www.ongietorri.org turismo-blogaren bitartez. Iada 20 ekarpen baino gehiago jaso dituzte eta txokorik hautatuenen artean daude, momentuz, Elgoibarko Sallobente-Ermuaran bailarako txoko eta bazterrak.



Idotorbe-San Pedroko frontoia, txokorik gustukoenerako beste hautagai bat

Debabarrenako txokorik gustukoena zein den esatearren, zergatia barne, parte hartzaile guztien artean Belaustegi Jatetxean bi lagunentzat bazkaria zozketatuko dute antolatzaileek. Lehiaketa puri-purian dago eta txokorik hautatuenak momentuz hauexek dira: Elgoibarko San Lorenzo inguruak, Karakate, Debako Santa Katalina, Eibarko Santa Krutz ermita, Lastur, Eibarren Arrate...
Partehartzaile bakoitzak proposamen bakarrarekin parte hartuko du eta balorazio sistema honakoa izango da:
  • Txoko gustukoenaren proposamena eta zergaitia: 1 puntu.
  • Txoko gustukoenaren proposamena, zergaitia eta argazkia: 2 puntu.
  • Txoko gustukoena, zergaitia, argazkia eta zure blogean ekimenaren berri eta ongietorri.org blogera lotura: 3 puntu.
 Parte hartzeko, bidali mezu bat komunikazioa@debegesa.com helbidera.
Otsailaren 28ra arte jasoko dituzte proposamenak eta martxoaren 2an jakinaraziko dute zein izan den irabazlea. Jasotako argazkiak Debabarraneko promozio turistikorako erabili ahal izango dira, beti ere autorearen izena jarrita.
 
 
Gizartea Elgoibar