•Emozioa azken unera arte
Lehen bi partidak irabazi ostean; 30 eta 21 Nafarroako Itxakori eta 27 eta 19 Galiziako Peguformi, Valladolideko Aula Cultural taldearen aurka jokatu zuen IMHk Espainiako Txapelketako azken faserako sailkapena erabakiko zuen partida erabakigarria. Eta, asteburuko bi talderik onenen arteko norgehiagoka parekatua izan zen oso. Aurkariek etxean jokatzen zuten arren, IMHkoak ez ziren kikildu eta partidaren bila joan ziren hasieratik, saria handia baitzen. Atsedenaldian aurretik ziren elgoibartarrak, baina azken txanpan partida berdintzea lortu zuten Valladolidekoek. Markagailuak 28nako berdinketa erakusten zuenean, irabaztera behartuta zeuden elgoibartarrak, berdinketarekin –sartu eta jasotako gol kopurua dela-eta- Valladolideko taldearen esku baitzegoen sailkapena. Saiatu ziren garaipenaren gola sartzen, baina Aula Culturalek 20 segundoren faltan sartu zuen golak garaipena eta Espainiako zortzi talderik onenen aurka lehiatzeko aukera eman zien.
Denboraldi aparta egin du aurten IMHk. Bigarren urtez jarraian Euskadiko txapeldun izatea lortu dute eta azken unera arte Espainiako Txapelketaren azken fasera sailkatzeko aukera izan dute kadete mailako neskek.