Sei elgoibartarrek parte hartu zuten domekan Zegama-Aizkorri
mendi-maratoian, horietatik bostek amaitu zuten proba gogorra eta bik,
gainera, postu oso onak lortuz; Jon Revert 51. postuan eta David Conde
52. postuan sailkatu ziren, hurrenez hurren. Antxintxikarien arerio
nagusia gainditu beharreko 5.470 metroko desnibela izan zen, beste
behin, baina goiz guztian altxatu ez zuen behe-lainoak ere ez zizkien
gauzak erraztu, ez parte hartzaileei eta ezta ikusleei ere.
Zortzigarren ekitaldia izan da aurtengoa, eta berriz ere Munduko
Koparako puntuagarria.
Antxintxikarien ahala muturreraino eramaten duen proba izan arren, lagun mordoak parte hartu nahi izaten du urtero Zegama Aizkorri maratoian. Antolatzaileek, baina, 400 lagunetan ezarri dute parte hartzaileen muga. Proba gogorreko lehen oztopoa zozketan aukeratua izatea da, hortaz. Sei elgoibartarrek gainditu zuten zoriak ezarritako lehen galbahea eta Zegamako irteeran egon ziren domeka honetan. Unai Narbaizak hanketako minez bertan behera utzi behar izan zuen lehia, baina gainerakoek postu onak lortu dituzte. Denbora guztian lainopean aritu ziren arren, marka onak egin zituzten, gainera, elgoibartarrek. Mendaron bizi den Jon Revert elgoibartarrak, esaterako, 2007ko ekitaldian ezarri zuen bere markarik onena hobetu zuen, 11 minutuan hobetu ere. Ikus beheko taulan elgoibartarren sailkapena.
Postua
Izena
Denbora
Erritmoa
51
Jon Revert
04:48:15
6:50
52
David Conde
04:48:17
6:50
88
Xabier Bergaretxe
05:01:15
7:08
215
Iñigo Lariz
05:52:16
8:21
230
Josu Mendicute
05:54:17
8:24
• Ingeles bat eta italiar bat bizkorrenak
Sailkapen nagusiari dagokionez, Ricky Lightfoot –hanka arin moduan itzul daiteke bere abizena- ingelesak irabazi zuen lasterketa, 04:03:12 denbora eginez. Nesketan, berriz, Emanuela Brizio italiarrak 04:38:19 denbora egin zuen eta beraz, errekorra hautsi. 345 gizonezko eta 35 emakumezko izan zirela guztira, eta azpimarratzekoa da Oihana Kortazar elgetarrak, 2008ko Karakateko Igoerako irabazleak eta errekorraren jabeak, 7. postuan amaitu zuela lasterketa. Ikus hemen:Sailkapen osoa (pdf)