Gorenak kartzela zigorra arindu dio Juan Mari Mendizabali

elgoibarren.net 2009ko mai. 27a, 09:38
Deskargatu Info Ahotsak :
es en fr

Zortzi urte eta erdiko kartzela zigorra bete beharko du Juan Mari Mendizabal elgoibartarrak Auzitegi Gorenak atzo jakinarazi zuen 18/98 auziaren epaian jasotzen denez. Hortaz, Auzitegi Nazionalak aurrez ezarri zion 13 urteko espetxe zigorra arindu dio Gorenak. Auzitegi Nazionaleko epaiak “zuzendari mailan” zigortu zuen elgoibartarra eta Auzitegi Gorenaren epaiak, berriz, ETAko kide gisa laga du Mendizabalen esku-hartzea.

 
 Auzitegi Gorenak zigorrak banan-banan zehazteko orduan talde batzuk egin ditu, “ardura maila” ezberdinen arabera. Auzitegi Gorenaren arabera, akusatu batzuk “zuzendari” gisa aritu dira eta beste batzuk ETAko kide gisa. Azken multzo horretan sartu dute Juan Mari Mendizabal, Auzitegi Nazionalaren epaiak, aurrez, “erakunde armatuko agintari” gisa zigortu bazuen ere (13 urte). Oro har, auzipetu gehienei egotzitako ETArekiko lotura ontzat jo du Auzitegi Gorenak, baina lotura horren gradua ezartzean datza aldaketa nagusia.
•Imanol Iparragirre
  Bestalde, atxilotu aurretik Elgoibarren bizi zen Imanol Iparragirrek sumario berean 11 urteko zigorra zeukan, eta Gorenak emandako sententziaren arabera, zazpi urte eta sei hilabete egin beharko ditu kartzelan.
•291 urteko kartzela zigorrak orotara
 ETAko aparatu politikoaren kontrako sumarioan, 18/98 sumarioan, Auzitegi Nazionalak zigortutako 47 lagunetatik 37ri zigorrak murriztu dizkie Auzitegi Gorenak, eta beste bederatzi absolbitu ditu. Horrela, 38 lagun irmoki zigortu dituzte.
 Guztira, 291 urteko espetxe zigorrak ezarri ditu Gorenaren epaiak. Beraz, nabarmen murriztu du Auzitegi Nazionalak ezarritako kopurua (525).
 Auzitegi Gorenak, funtsean, bere egin ditu akusazioen tesi nagusiak. Era berean, KAS, Ekin eta Xaki legez kanpoko jotzea eta desegitea ontzat jo du.
    ∞Ikusi albiste hau ondorengo hedabideetan: eitb; berria; diariovasco; gara
 
 
 

Politika Elgoibar