San Migelak motorrak eta feria; batera baina ez nahastuta

•Txorro Morro antzezlana
  Kiribilka egitasmoaren barruan Txorro Morro antzerkia eskainiko dute gaur (irailak 25) Plaza Handian, 17:30etik aurrera.

•Rock kontzertua Mendaron
  Descriados eta Tempestades taldeen kontzertua Mendaroko Gaztetxean. Gaur, barixakua, 22:30ean.

•San Migel Jaiak 2009 

  Gaurtik (irailak 25) hasita, makina bat ekitaldi izango dira martitzenera arte Aiastia-San Migeleko jaietan. Berezienetako bat, dudarik gabe, Haritz Euskal Dantzari Taldeak eskainiko duen emanaldia, urteetan dantza taldean jardundako Borja Uzuriaga sanmigeldarrari omenaldi beroa egingo diotelako. Martxoaren 1ean zendu zen istripu batean, 25 urterekin. Haritz taldeak Arabako eta lapurdiko dantzak eskainiko ditu, 22:30etik aurrera, Murkaikupe frontoian. (Ikusi San Migel Jaien egitaraua ondoko taulan)

 

•Hileko azken zapatuko feria

  Hilero bezala, ganadu feria eta Elgoibarko baserrietako produktuak erosteko aukera izango da zapatu honetako ferian. Berezitasun bat izango du, ordea. Antolatzaileek (Udala eta Debemen) aipamen berezia egin nahi diete Ordiziako gazta lehiaketako irabazleari, Mausitxa baserriari, eta barazkien arloan bigarren saria eskuratu zuen Txillarre baserriari. Honela, goizeko 11:00etatik aurrera Mausitxako gazta irabazlearen doako dastaketa eskainiko zaie herritarrei Nafarroa plazan. Dastaketan, gainera, sagardoa ere banatuko da, Lizundia txabola baserriko sagardoa, hain zuzen ere. Bi baserriek, Mausitxak eta Txillarrek, Ordizian irabazitako garaikurrak jarriko dituzte ikusgai.

•Kale kantarien saioa
  Elgoibarko kale Kantariek saioa eskainiko dute zapatuan, 11:45etik aurrera, Nafarroa enparantzan. San Bartolome jaietan, Baserritarren Egunean, irten ziren azkenekoz kale kantariak kalejiran.

•Motorren III. Kontzentrazioa

  Skull's Riders taldeko kideek hirugarren urtez antolatu dute motorren kontzentrazioa. Asteburu osorako egitaraua prestatu dute, eta berrikuntzekin datoz, gainera. Gazte batek bi motorrekin ikuskizun berezia eskainiko du zapatu arratsaldean (19:45) Plaza Txikian, eta gauean (23:30) Bocanada taldearen musika kontzertua izango da Madalako parkean. Domekan, 11:00etatik aurrera, motorren kontzentrazioa izango da Plaza Handian.