Ion Ruiz sukaldariak oso azkar prestatu zutela guztia azaldu du, “hamar eguneko kontua izan da dena; pentsatu, izena eman eta pintxoa prestatu”. Beharbada presagatik edo horrelako lehiaketetan parte hartzera ohituta ez daudelako akaso, akats batzuk egin zituztela onartzen du Ruizek: “aurkezpenean, batez ere”. Dena dela, pintxoen itxura edo aurkezpenak %20ko balioa bakarrik ei dauka azken puntuazioan eta, Lojantzik aurkeztutako pintxoak, zaporean atera zien abantaila gainontzekoei. Final handirako gogotsu eta aldi berean urduri dago Ruiz. “Oraindik ez dizkigute finalerako oinarriak pasa eta, ondorioz, ez dakit zer egin beharko dugun. Egin beharreko lana dena dela ere gogotik saiatuko gara”.
|
|
Pintxoen, edo Ruizek nahiago duen moduan “miniaturazko sukaldaritzaren” presentzia indartu nahi dute Lojantziko jabe berriek –duela bi hilabete eskas ireki zuten taberna Oscar Toledano eta Jorge Corredeira elgoibartarrek-. Ohiko pintxoak baino landuagoak egiteko asmoa dute. Sukalde artean pilatu duen 22 urteko esperientziaz –Baqueira Bereteko lau izarretako Montardo Hotela izan da bere azkenaurreko geltokia- baliatuko da Ion Ruiz gutizi ttipiok sortzeko.
∞Informazio gehiago:
*Sarrerako argazkia: Michelena/DV