Airera igo eta berehala, Gotzon bere familiaren epelean zelan egoten zen erakutsi ziguten Miel Anjelek eta Iñakik; aurrerago, berriz, Gotzoni euskararen sugarra noiz eta zelan piztu zitzaion ikusi genuen; gero, Gotzon jesuita ezagutu genuen, eta 31 urterekin apaiz egin zeneko unea ere bai; lehen artikuluak zelan eta non idatzi zituen ere jakin genuen, eta bere liburuak ezagutu genituen; baserriz baserri ere ikusi genuen, eta baserritarrei Gotzonek zor zien miresmenaz jabetu ginen; Deusturen gainetik ere pasa ginen, eta han ikusi genuen Gotzon ikaslez inguratuta; amaiera aldera, Gotzon han eta hemen sumatu genuen euskaldunon esker onak eta omenaldiak jasotzen, pozik, denei eskerrak emanez; eta hegazkinak lurra hartu aurretik, Loiolatik pasa ginen. Han dago Gotzon orain, berak amesturiko zeruan: “Nik zerua nola izango den pentsatzen dudanean, Suitza bezalakoa izango dela pentsatzen dut. Hango edertasuna, hango txukuntasuna, hango ordena zoragarria!”
|
|
|
|
Polita izan zen; edarra. Atzera begira jarri eta, 45 minutuan, 74 urteko bidaia egin genuen. Gotzonek mundu honetan egin duen bidaia bera, hain zuzen ere. Bi pilotuak emozionatu ere egin ziren hegazkina geratu zenean, baina bidaia ederrenak ere hasi eta amaitu egiten dira. Hori bai, Miel Anjelek idatzitako Gotzon Garate Goiartzun (1934-2008) liburua besapean genuela hartu genuen etxerako bidea. Bidaia amaitu zen, baina Gotzonek gure artean segitzen du.
BIDEOA: Atzoko bidaiara etortzerik izan ez zenutenok, hemen daukazue harekin disfrutatzeko aukera:
{vimeo}7191064{/vimeo}*Bideo-lanak: Aitor Lauzirika
•Juan Martin Elexpuru, urriaren 28an
Gotzonen omenez prestatu dugun hitzaldi-zikloarekin segituz, datorren asteazkenean, urriak 28, Juan Martin Elexpuru bergararra etorriko da gurera. “Euskararen jatorria, zalantza artean igerian” izango da haren hitzaldiaren izenburua. Hitzaldia Kultur Etxean izango da, arratsaldeko 19:00etan hasita.