ETSko arduradunen esanetan, datorren astean ez dute lanik egingo, baina azaroaren lehenengo astean bai. Astebeteko atsedenaren ondoren, hiru egunetan makina bateatzailea pasatuko dute, trenbideari azken ukituak eman eta bere lekuan kokatzeko. Aurreratu dutenez, makina horrek zarata handia egiten du, “baina egin beharreko lana da”, gaineratu dute. Badakite gauez lan egiteak auzotar asko aztoratzen dituela, alabaina, euren ustez, kalte gehiago sortzen dira egunez, tren zerbitzua eten egin behar delako.
Auzotarren amesgaiztoa
Auzotarren amesgaiztoa
Zarataren erruz behar bezala lo egiteko zailtasunak izan dituzte, batez ere, trenbide aldera logelak dituzten bizilagunek. Eta noski, euren osasunean eta egunerokoan igarri dute lo egin ezinak sortutako kaltea. Euren kexua adierazteaz gain, norbaitek neurriak hartu beharko lituzkeela uste dute: jarraipen bat egin, auzotarren ongizateaz kezkatu eta beharrezkoa bada baita zarataren neurketa bat egin ere; sortutako dezibelioek legeak onartzen dituenak baino altuagoak diren edo ez jakiteko. Auzotarren eskubideak babestearen ardura, Udalari dagokiola uste dute batzuek baina, horrelako egoera baten aurrean galduta, nora jo behar duten jakin gabe, sentitu direla ere aitortu dute. Amaitzeko, gogora arazi nahi dute, beraiei bizitzea tokatu zaien "amesgaizto" hau, beste bati toka dakiokeela hurrengoan.