Torrealdaik Eibarren esandakoak

Epaiketa atarian, "beste ahalegin bat" eskatu die herritarrei Joan Mari Torrealdai Egunkariako auzipetuak

Sei urte joan dira, Espainiako Auzitegi Nazionalaren aginduz, Guardia Zibilak Euskaldunon Egunkaria itxi zuenetik, eta luze ez dela hasiko da sumario nagusiko epaiketa. Bost lagun epaituko dituzte: Joan Mari Torrealdai, Txema Auzmendi, Iñaki Uria, Martxelo Otamendi eta Xabier Oleaga. Atzo, Joan Mari Torrealdaik auziaren nondik norakoak azaldu zituen Eibarko Arrate Kultur Elkartean, Eibarko Egunkariaren Aldeko Plataformak antolatutako hitzaldian.

Egunkaria itxi zutenetik “infernua” bizi dutela aitortu zuen Joan Mari Torrealdaik. “Gau hartan modu batera oheratu nintzen, eta beste modu batera jaikiarazi ninduten 1:30ak aldera. Kulturgintzan egindako urteetan bildutako material guztia kendu zidaten, eta bat-batean terrorista bihurtu nintzen. Sekula aurretik pentsatu ez nuena gertatu zitzaidan, zuetako edonori gaur bertan gerta dakizuekeen moduan, kolpera. Inork ez zuen espero”, gogoratu zuen. Atxilotze uneko tratua “oso-oso gogorra eta basatia” izan zela aitortu zuen, eta inkomunikatuta egin zituzten bost egunetan “arra” balitz moduan tratatu zutela. Itxieraren bosgarren urtemugan salatu zituen torturak Joan Mari Torrealdaik. “Jakingo duzue gure gurasoek nola ezkutatzen zituzten gerra garaikoak, mina ez trasmititzeko. Bada, fenomeno hori ez zen gerra garaian bukatu”, azaldu zuen.

Atxilotu zituztenetik honako denbora “literatura poliziala” irakurtzen egin du Torrealdaik, defentsa prestatu ahal izateko: “Nire bizitza goitik-behera aldatu da. Bizitzaren hiru-laurdenak epaiketari eskaintzen dizkiot orain, derrigorrean. Mundu zikina eta iluna da hau, susmoetan oinarritutakoa, baina nahi zutena lortu dute. Euskal kulturatik atera gaituzte, eta guk euskal kulturari eman geniezaiokeena eten dute”.

Fiskala, auzia artxibatzearen alde

Fiskalak behin eta berriz eskatu du auzia ixteko, froga eta oinarririk ez dagoelakoan. Akusazio partikularrik ere ez dago, baina AVT eta Dignidad y Justicia herri akusazioen bultzadarekin epaiketa egitea erabaki du epaileak. “Fiskala bera bihurtu da gure defentsa onena. Fiskalak - berez akusazio publikoa den horrek- egurra eman dio epaile instruktoreari, Juan del Olmori. Ez dira ematen epaiketa egiteko baldintzak. Europako herri batean ez gintuzten gu epaituko”. Fiskalak akusazioa erretiratu izanak bereizten du Egunkaria auzia gainerako euskal auzietatik.

 Epaiketaren aurrean, kezka azaldu zuen Torrealdaik. “Ezin da esan Auzitegi Nazionala justiziaren tenplu bat denik”, esan zuen. Orain arteko prebisio txarrenak bete izanaz gain, bada sententzia aldekoa ez dela izango pentsatzeko beste arrazoi bat, bere esanetan: “Epaiketa egin eta zigorrik jarri ezean, guk kalte-ordainak eskatzeko eskubidea dugu. Kalte-ordain horrek, gainera, oso handia izan beharko luke, eta jakina, hori horrela izanda, ezin gaituzte besterik gabe absolbitu”.

 

 Epaiketaren aurrean, orain arte jasotako babesa eskertu zuen Torrealdaik.  “Erein duguna baino gehiago jaso dugulakoan gaude. Jendearen aldetik jaso dugun babesak, berotasunak eta maitasunak mantendu gaitu zutik, eta duintasunez gainera”. Horrenbeste erasoren aurrean, eta manifestazioek eta bestelako aldarrikapenek emaitza onik ekarri ez dutela ikusita, jendea nekatuta egotea ulertzen duela gehitu zuen. Hala ere, beste ahalegin bat eskatu zuen. Horren harira, Egunkaria itxi berritan Donostian egin zen manifestazioa ekarri zuen gogora, eta haren pareko bat errepikatzea gustatuko litzaikeela aitortu zuen. “Euskarak batzen gaituela erakustea nahiko nuke”.
Ainara Argoitia

Hurrengo egunotan informazio zehatzagoa emango badugu ere, hau da Elgoibarren Egunkariaren alde prestatzen diharduguna:

1. Bonoak eta kamisetak salgai: 10 eta 50 euroko bonoak daude salgai Elgoibarko Izarran eta BARREN astekarian, epaiketak izango dituen gastuei aurre egiteko. Gainera, Egunkariaren aldeko kamisetak ere salduko ditugu, 10 eurotan.
2. Erretratua Foruen plazan: Azaroaren 28an, zapatua, erretratu bat aterako dugu Foruen plazan, auzipetuei elgoibartarron babesa erakutsi eta auzia bera salatzeko. Eguerdiko 12:00etan bilduko gara erretratua ateratzeko.
3. Autobusa Bilboko manifestaziora joateko: Eguna zehazteko badago ere, Egunkariaren aldeko manifestazio nazionala egingo da Bilbon. Epaiketa eguna jakitean zehaztuko da manifestazioaren eguna, eta Elgoibarko Izarrak autobusak antolatuko ditu, eskualdeko beste euskara elkarteekin batera.