Alkortako igoera jokatuko da bihar Mendaron

 

Korrikalarien hilabetea
 Antxintxikazaleen hilabetea da, dudarik gabe, azaroa. Hilabete honetan jokatu dira Behobia-Donostia ospetsua (azaroak 8) , Karakateko Igoera (azaroak 14), Alkortako Igoera (azaroak 20) eta Donostiako Maratoia (azaroak 29). Poker ederra denak eginez gero!

  Alkortako igoerara Karakateko igoera jokatzetik etorriko dira lasterkari asko ziurrenik, eta, tartean, Alkortari neurria hartutakoak ere izango dira. Joseba Plaza markinarra izan daiteke horietako bat; azken egunetan Alkortan gora eta behera ikusi dute markinarra Mendaro aldean. Plazak berak irabazi zuen iaz Alkortako Igoera eta, gainera, marka berria (20:43:00) ezarri zuen. Joan den asteburuan Karakateko Igoeran ere parte hartu zuen markinarrak eta hirugarren postuan sailkatu zen (bere blogean idatzita laga ditu Plazak Karakateko aldapetan bizitakoak eta baita igoerari buruz duen iritzia ere).

 

Izena ematea eta sariak

 Izen-emateak plazan egingo dira, bi eurotan, lasterketa hasi baino ordu erdi aurretik. Hiru sari banatuko dira. Irabazlearentzat txapela eta garaikurra izango dira, eta ondorengo bientzat garaikur bana. Ondoren, lasterketa ostean, salda eta txorizoa banatuko dituzte, Alkortan. Ezker abertzaleak antolatzen du proba hau, euskal presoen eskubideen aldeko aldarrikapen gisa.